Hopp til innhold

Melkhein viikon uutiset / Viikko 4

Melkhein viikon uutiset fortsetter å ta opp ukens viktigste nyheter hver fredag på kvensk, men nå får du nyhetene også med lyd og bilde. Nyhetenene er tekstet både på kvensk og norsk.

Kotimaa

Hallitus meinaa lieventäät koronarajoituksii niin ko FHI oon anbefaalanu, sanoi tervheysministeri Ingvild Kjerkol keskiviikkona TV2:le. Vaikka institutti sen uuđessa riskiraportissa arvioi, ette kolme eli neljemiljuunaa norjalaista tulhaan saamhaan koronan ennen juunikuuta, anbefaalaa se kuitenki lievimpii rajoituksii.

Tirehtööri Camilla Stolten-bergin jälkhiin Norja nimittäin kestäät nyt usheempii tartuntoi. Ihmiset oon hyvin vaksineerattu ja omikronin takia oon pienempi mahdolisuus tulla vakasti sairhaaksi.

Ulkoassiindepartementti pyyttää norjan kansalaissii vältämhään reissui Ukrainhaan. Vuođesta 2014 saakka depatementti oon pyytäny ihmisii vältämhään Donetskin, Luhanskin ja Krimin plaanoi, mutta nyt anbefaalinki koskee koko maata. Syynä oon kriisi Venäjän ja Ukrainan välilä.

Tällä viikola Talibanin representantit oon ollu vierailula Norjassa. Se oon Norjan ulkoassiindepartementti joka kuttui Talibanin maahan. Tämä oli kans ensimäinen kerta Afganistanin valloituksen jälkhiin ko Taliban käy läntisessä maassa.

Vierailun moolina oli praatata muun muvassa Afganistanin humanitäärisestä kriisistä ja minkälaissii vaatimuksii Norjala ja muila läntisilä maila oon.

Moni oon kans kritisoinu päätöstä kuttuut Taliban Norjhaan. Frp:n johtaaja Sylvig Listhaug oon muun muvassa vaatinu hallitusta tulemhaan Isotinkhaan ja selitämhään miksi Taliban oon päästeetty maahan.

Mailma

Usheita ihmissii loukkaanuthiin ja yksi kuoli Heidelbergissä Tyskässä, ko mies hyökkäs asheen kans universiteetin lukusalhiin ja alko amppumhaan. Ampumies kuoli kans itte hyökkäyksen jälkhiin. Hän oli itte universiteetin studentti, mutta poliisi ei vielä tieđä hänen motiivii.

1. februaarikuusta saakka Tanska oon taas auki. Täysin auki. Niin sanoi maan staatinministeri Mette Fredriksen keskiviikkona. Tanskalaisile se meinaa suumaskin ja koronapassin loppua, ja ette het saatethaan taas täyttäät stadionit konserteila ja jalkapallokamppailuila.

Tämä oon siirtyminen uutheen aikhaan meile kaikile, sanoi Frederiksen.

Meiđän mailma

Tanssaaja ja koreograafi Astrid Serine Hoel tullee olemhaan myötä Festspillene 2023 tapattumassa. Hän sai avustuksen Festspillens Open Call-oorninkin kautta ja luo sen avula tanssiesityksen, jonka fokuksena oon kväänin kulttuuri ja trađisjuunit. Esityksen työylikirjoitus oon «Karhuntanssi».

Sunnuntaina Tromssan museumissa aukaisthiin uusi kunstinäyttely Tuulessa. Näyttely oon osa tutkimusprosjekti IMMKVEN:iä, jonka kans UiT, Norjan arktinen universiteetti, Vadsø museum - Ruijan kvenmuseum ja Nicolaysen Film oon työtely viimiset nelje vuotta.

Tutkimuksen moolina oli selvittäät kunka kväänin kulttuuri oon näkyvä tääpänä norjalaisessa yhtheiskunnassa, kultuuriplaanala ja museoissa.

Vaikka työ tutkimusprosjektin kans ei ole vielä valmis, saattaa työlaaki sannoot, ette kväänin kulttuuri oon tuulessa. Kväänin miljöössä tapahtuu paljon ja kulttuuri oon joka päivä näkyvämpi. Ja sen het heluthaan näyttäät kans näyttelyssä.

Kristine Nicolaysen muistelee, ette ihmiset tulhaan oppimhaan lissää kainulaisista ja kväänin kulttuurista näyttelyn avula.

Hei sinule!

Har du tanker om saken du har lest, eller innspill generelt til Viikon tärkkeimät uutiset? Send meg gjerne en e-post!