Viikkouutiset kvääniksi

Kotimaa

Nuorta miestä ammuthiin Uslussa tuorestai iltana ja hän oon nyt kriittisessä tilassa sikhuusissa. Ampuminen tapahtui Lofsrud koulula noin kello 22:30. Poliisin jälkhiin paikala oli monta henkkee, mutta poliisilla ei ole vielä informasuunii tekiijästä.

– Tapattuma oon todela vakava, koska se tapahtui paikassa missä oon paljon nuoria ihmisii, sannoo Uslun poliisi Grete Lien Metlid.

Uslussa oon sattunu seittemen viikon aikana seittemen ampumaepisoođii. Metlid sannoo ette poliisi ei usko, ette episoođit liitythään toisiinsa, mutta oon huolestunu.

– Uslu on turvalinen kaupunki, mutta tämä huolestuttaa meitä.

Työväjenparttii (SDP) ja Keskusparttii (SP) jatkethaan hallitusneuvottelui. Johtaajat Jonas Garh Støre ja Trygve Slagsvold Vedum ei ole sikkari koska het oon valmhiita, mutta yhtheistyö sujjuu kuulema hyvin.

– Mie meinaan ette met työtelemmä aktiivisesti ja hyvin. Se oon kovvaa työtä, mutta niin se häytyy olla ko meilä oon se velvolisuus mikä meilä oon, sannoo Vedum.

Kaheksen prosenttii Norjan tervheystyöteliijäästä ei ole ottanu koronavaksiinii. Lisäksi yksi kymmenestä oon ottanu tyhä yhđen piston vaksiinii. Se saa monet hieromhaan silmiinsä.

– Mie meinaan ette se oon hirveen hävytöntä. Mie olin luulu ette kaikki jokka työtelhään tervheyssektorissa olis saanu vaksiinin. Het työtelhään ikämiesten ja sairhaitten kans joka päivä. Jos het saađhaan koronatartunnan het saatethaan kuolla, sannoo Altan vanhusraatin johtaaja Arnfinn Sarilla NRK:lle. Pohjois-Norjassa 14 prosenttii tervheystyöteliijöstä oon saanu tyhä yhđen vaksiinipiston. Se oon isoin prosentti koko maassa.

Samalla Fagforbundet halluu, ette kaikki tervheystyötelijät sais heti kolmanen vaksiinin.

Norjan rajat oon taas auki. Pandemian aijan oon HV, tullimiehet ja poliisi toppanu kaikki, jokka oon freistanu tulla Norjaan rajan yli. Mutta keskiviikosta asti maahan tulo oon ollu taas vappaata.

Poliisi kuitenki muistuttaa ette jokku häyđythään yhä ottaat koronatestin. Tämä koskee ihmisii jokka ei ole ottanu molempii vaksiinii ja jokka tullee punaisista eli tummanpunaisista maista. Tulli seuraa FHI:n tartuntakarttaa.

Tervheysministeri Bent Høie (H) muisteli pressekonferenssissa tiistaina ette yli 65-ikhäiset henkiit tulhaan saamhaan kolmanen koronavaksiinin. Se oon ollu Kansantervheysinsitutin (FHI) neuvo. Vaksiinin saa ensiksi yli 85-ikhäiset, sitte 75-84-ikhäiset ja lopuksi 65-74-ikhäiset.

Mailma

Nobelin rauhanpalkinto jajethiin tääpänä. Palkinon sai journalistit filippiiniläinen Maria Ressa ja venäläinen Dmitri Murato sananvappauđen eđistämisestä omissa maissa.

Nobel-komitea antoi palkinon heile, koska het tehđhään journalismia, joka oon vappaata, itsenäistä ja faktapohjaista, vaikka maiđen päätösvallat freisthathaan estäät heitä aktiivisesti.

– Mie olen shokissa, sannoo Maria Ressa Rappler-nettisaitile, joka oon hänen oma.

Aijemin tällä viikola Abdulrazak sai Nobelin litteratuuripalkinnon.

Viimi vuođen aijan yli 600 journalistii 150 mediatalosta ympäri mailmaa oon teheny yhtheistyötä ja tutkinu lähes 12 miljuunaa paljastunutta dokumenttii salaisista firmoista ja omaisuuksista. Dokumentiitten jälkhiin 35 nykystä ja entistä staatinjohtaajaa oon laitanu rahaa eli johtanu firmoja paikoista, ”Veroparatiisiista”, jokka tunnethaan salhaisuukista ja matalista veroprosentiista. Tämä koskee kans 300 politikkarii ja virkamiestä sekä 130 dollarimiljartinäärii.

Aftenposten/E24 sannoo ette se oon kans löytäny yli 300 norajaista näistä paperiista. Nämä ihmiset oon esimerkiksi frisööriitä, lakimiehii ja kuljettaajii. Heistä usseimat omistethaan anonyymii firmoi näissä paikoissa.

Isossa Britaniassa oon ollu muutaman viikon bensiinikriisi. Se johtuu isosta kuljettaajapuuttheesta. Maalta vailuthaan 100.000 lastipiilikuljettaajaa, jokka saatethais ajjaat bensiinii bensiinipuođiile. Tämän lisäksi hyllyt putikissa oon tyhjät.

Staatinministeri Boris Johnson oon pyytäny armeijan appuu kriisiin, ja se oon nyt alkanu ajjaat bensiinii ympäri maata. Britannia oon kans pyytäny appuu esimerkiksi Tyskältä, mutta het ei halluu tarjota heiđän tukea Brexitin takia.

Ruovan hinta oon kassu 30 prosenttii mailmala FN:n hintaindeksin jälkhiin. Se oon sukkeri, kasvirasva ja nisu joiđen hinta oon noussu eniten. Tämä johtuu kuivuuđesta, joka oon ollu esimerkiksi USA:ssa, Kanadassa ja Kasakhstanissa.

Suomi ja Ruotsi ei anna ennää Modernan-koronavaksiinii miehile, jokka oon 30-ikhäisii eli nuorempii. Syynä oon ette nuorila miehilä oon isompi riski saađa syđänlihaksenajos vaksiinista ko muila.

THL:n (Tervheyđen ja hyvinvoipainsitutin) tutkiija Petteri Hovi sannoo, ette het jokka oon jo ottanu Moderna-vaksiinin, ei häyđy olla huolestunu. Se oon harvinaista, ette ihminen saa ajoksen vaksiinista.