Sander Larrson Framnes (23) oon saanu työpaikan NRK:n Tromssan ja Finmarkun läänikonttuurilta, ja tullee olemhaan NRK Kväänin uusi, kolmas journalisti. Läänikonttuuriredaktööri Håkon Grønbech oon iloinen, ette laakiin saađhaan nyt uusi nuori journalisti.
– Sander oon etheenpäin kattoova journalisti joka saattaa kattoot kvääni assiita nuoresta näkökulmasta. Samala hän tiettää tođela paljon kväänin kulttuurista ja kielestä. Se oon hyvä assii niin publikumile ette NRK:le, sannoo Grønbech.
Läänikonttuuriredaktööri NRK Tromssa ja Finmarkku, Håkon Grønbech
Foto: privatLarsson Framnes oon pois Tenosta, mutta assuu Vesisaaressa. Sielä hän kans tullee tekemhään töitä NRK:le oktooperikuun alusta saakka.
– Met olema iloissii ette met saatama vahvistaa laakkii hengelä, joka tullee työtelemhään juuri Vesisaaressa. Niin kaupungilla ette koko plaanala oon tärkkee osa kväänin kulttuurii, histoorii ja kieltä. Yksi meiđän mooliista oon tuođa vielä enämpi esile kaikkee, mitä tällä plaanala tapahtuu.
Tullee työtelemhään kotiseuđula
Larsson Framnes iloittee uuđesta työpaikasta.
– Oon fiinii jatkaa työtä kväänin kans ja tällä kerttaa kotiseuđula. Se, ette mie saatan kohđatella ihmissii täälä ja näyttää, ette kväänin meedia oon kans myötä näilä pienilä plaanoila, tullee ehtotoomasti olemhaan hieno kokemus, sannoo hän.
Hän halluu varsinki nostaat esile niitä assiita, jokka oon tärkkeitä nuorile kvääniile.
– Samala mie halluun tehđä nuorii kväänii enämpi näkkyyväksi, ja näyttää ette kulttuuri ja identiteetti ei ole vain vanhoitten assii, mutta kans relevatti nuorile.
Larsson Framnes tullee aloittamhaan NRK Kväänilä oktooperikuun alussa. Hän oon aijemin työtely journalistipraktikantina kvääni aviisi Ruijan Kaijula, missä hänelä oli muun muassa eđesvastaus Ruijan Raation lähätyksistä.
