Hopp til innhold

Melkhein viikon uutiset / Viikko 50

Melkhein viikon uutiset fortsetter å ta opp ukens viktigste nyheter hver fredag på kvensk, men nå får du nyhetene også med lyd og bilde. Nyhetenene er tekstet både på kvensk og norsk.

Kotimaa

Siitä oon nyt yhđeksen päivää ko hallitus otti käytthöön uuđet tiukemat koronarajoitukset. Tiistai yönä jokku näistä rajoituksista tulthiin vieläki tiukemiksi hallituksen pressekonferensin takia, joka piđethiin maanantaina.

Nyt esimerkiksi restaurantit ja kafejat ei saa myydä alkohoolii, ja kaikki jokka saatethaan työtelä kotona, häyđythään se tehđä. Lisäksi hallitus otti käythöön keltaisen tilan lastentarhaissa ja kouluissa, ja punaisen jatkokouluissa. Se meinaa ette koulut saađhaan olla auki, mutta ihmisten häyđythään pittäät välimatkaa toishiin.

Tiistaina Norjassa registeerathiin 6003 uutta koronatappausta, joka oon korkkein luku koskhaan yhden janturin aikana. Keskviikona luku oli 5741.

Tiistaina hallitus kans otti käytthöön usheita uussii ekonomissii avustuksii niile, jokka kärsithään eniten koronarajoituksista.

2000 vuođen ikhäinen muun muvassa viikinkien, kvääniin ja saamelaisten venheenrakennustrađisjuuni oon nyt myötä Unescon kulttuuriperintölistala.

Kvääniin ja saamelaisten jokivenheet oon osa tätä rakenustrađisjuunii. Venheitä käytethiin ja käytethään yhä isoila jovila Pohjois-Norjassa ja Tornionlaaksossa, kuten Rautusjovela, Pyssyjovela ja Lemmijovela.

Mailma

21. desemperikuusta saakka Ruotti tullee vaattimhaan koronapassii pohjoismaiđen asukkhailta jokka tulhaan maahan, muisteli staatinministeri Magdalena Andersson tuorestaina. Se meinaa, ette norjalaiset saatethaan reisata Ruottiin, mutta het häyđythään seurata samoi reekeleitä jouluna, jokka oon käytös Norjassa.

Elä sie siirä festii rajan yli, sanoi Andersson pressekonferenssissa eilen tuorestaina.

Meiđän mailma

Musikkeri ja komponisti, Kristin Mellem, sai vuođen fylkinkulttuuripalkinon Tromssan ja Finnmarkun fylkinkomuunilta. Mellem oon monta vuotta työtely kainulaisen musiikkitrađisjuunin etheen, ja hänen työn takia moni kvääni ja norjansuomalainen saatethaan olla ylppee omista juurista, ilmoittaa fylkki pressekonferensissa.

Koulutusdirektoraatti anttaa 44.450 kruunuu prosjektiile Kläppihommaa. Prosjektin moolina oon eđesauttaa kväänin kielen asemaa Naavuonon lastentarhaissa. Kans Østerbotn luontolastentaras Porsangissa sai 150.000 kruunuu jotta se saattaa tarjota kväänin kieltä 17 lapsele.

Haltin kväänikulttuurisentteri oon saanu uuden johtaajan. Annie Blomli aloittaa työssä aprilikuussa. Oktooperikuussa sentteri ilmoitti, ette nykyinen johtaaja Pål Vegard Eriksen aloittaa työtelä journalistina maan ainuassa kainulaisten ja norjansuomalaisten uutisaviisissa, Ruijan Kaijussa.

Hei sinule!

Har du tanker om saken du har lest, eller innspill generelt til Viikon tärkkeimät uutiset? Send meg gjerne en e-post!