Hopp til innhold

Melkhein viikon uutiset / Viikko 49

Melkhein viikon uutiset fortsetter å ta opp ukens viktigste nyheter hver fredag på kvensk, men nå får du nyhetene også med lyd og bilde. Nyhetenene er tekstet både på kvensk og norsk.

Ukesnyheter på kvensk. Uke 49.

Ukesnyheter på kvensk. Uke 49.

Kotimaa

Tiistai iltana hallitus otti käytthöön usheita uussii kansalissii koronarajoituksii. Yhđenmeetterinreekeli oon tullu nyt takaisin, ja suumaskii häyđythään käyttäät taas koko maassa. Lisäksi sinula ei häyđy olla kotona enämpi ko 10 vierasta, ja hallitus pyyttää kaikkii hunteeraamhaan kunka monta lähikontaktii heilä yhtheensä oon. Tuorestai yöstä saakka alkohoolii ei kans ennää myyđä puolenyön jälkheen.

Rajoitukset tullee kestämhään nelje viikkoo, mutta kahđen viikon jälkhiin niitten käyttöö hunteerathaan. Rajoitusen moolina oon rajoittaa omikron-varinatin levviimistä.

Keskiviikkona Norjassa registreerathiin 5259 uutta koronatappausta, joka oon korkkein luku koskhaan yhden janturin aikana.

Kim Friele, joka oon vuossii kamppailu lespisten ja homoseksuaaliiten oikkheksitten eestä Norjassa, siunahtiin maanantaina Uslun tuomiokirkossa hauthaan.

Friele kuoli maanantai iltana 22. novemperikuuta 86-vuođen ikhäisenä, ja heti seuraavanna päivänä se oli selvää, ette staatti tullee maksamhaan hänen hautajaiset sen elämäntyön kunniaksi, minkä hän oon tehny.

Staatinministeri Jonas Garh Støre oli yksi monista, joka piti saarnan hautajaisissa. Paikala oli kans muun muvassa kuningatar Sonja ja kruunuprinsessa Mette-Marit.

Mie en usko, ette met vuona 2021 tajjuuma, minkälaista se oikkeeestansa oli, ko hän nousi sitä vasthaan mikä oli lakhiin kirjotettu. Ette ihmiset ei sais rakastaat sitä henkkee het rakastethaan. Hän oon kamppailu uskomattoman kuorman kans, mutta hän oon pysyny pystyssä, seisoi se muun muvassa Støren saarnassa.

Staatinministeri Jonas Garh Støre luppaa kans uussii avustuksii, jokka tullee heti autamhaan ihmissii korkeitten sähkönhinttoin kans. Staatinministerin jälkhiin avustukset tullee olemhaan kaikile, ei tyhä heile jokka saađhaan asumatukkee eli oon studenttiita.

Ennen hallitus oon jo luvanu, ette se tullee nostamhaan asumatukkee 1.500 kruunula desemperikuusta marskuuhun.

Entinen staatinministeri ja Høyren parttiinjohtaaja Kåre Willoch kuoli maanantaina 93-vuođen ikhäisenä. Willoch oli Norjan staatinministeri vuođesta 1981 vuotheen 1986, mutta oon ollu kans tunnettu ja rakastettu figuuri norjalaisessa politiikassa vuossii. Häntä kuvvailhaan ylimielisimäksi oikeistolaiseksi politikkariksi, joka oli myötä Norjan modernoimisessa 80-luvula.

Mailma

Keskiviikkona sosiaalidemokraatti Olaf Scholzista tuli Tyskän uusi liittokansleri ko hän otti eđesvastauksen maan hallinasta Angela Merkeliltä, joka oon olli liittokansleri vuodesta 2016. Scholz tullee johtamhaan maata yhdessä Vihriteitten, De Grønne og Vappaademokaattiiten, Fridemokratene kans.

USAn presidentti Joe Biden ja Venäjän presidentti Vladimir Putin kohđatelthiin tiistaina. Presidentit praatathiin Ukrainasta, Afganistanista, atomisopimuksesta Iranin kans, ja Venäjän ja USA:n suhtheista, mutta ei amerikkalaisen palvelushengen jälkhiin tulheet yksimielisiksi misthään.

Meiđän mailma

Tääpänä porsankilainen Arvid Petterson saa Kuninkhaan metaljin hänen työstä kulttuurin etheen pohjoisessa. Hän oon ollu pitkhään työtely paikalisen histooriiin ja kulttuurin kans, ja oli muun muvassa myötä Alattion ja Porsangin museumiin perustamisessa.

Petterson oon kasunu kvääninkielisessä perheessä Palojovessa.

Hei sinule!

Har du tanker om saken du har lest, eller innspill generelt til Viikon tärkkeimät uutiset? Send meg gjerne en e-post!