Hopp til innhold

– Nuoret saa kokkee kväänin kulttuurin omala tavala 

Haltiin kväänisentteri Raisissa kokkee ette se ei ole niin helppoo saađa nuorii myötä Paaskiviikon festivaaliprogramhiin. Nyt het kuitenki oon löytäny siihen tavan.

Talviunen jälkhiin: Utstilling på Sokkelvikhuset i Sørsjosen.

Näyttely Talviunen jälkhiin pidethiin Sokkelvikhusetissa Rässikäisessä.

Foto: Nina Rantala Eriksen / NRK

– Tuossa kuvassa met freistaama näyttää sen pienen loovan mihin kväänin kulttuuri oon freistattu puristaat.

– Sauna ja kaikki muu mikä oon eniten tunnettu kväänin kulttuurista, sannoo valokuvvaaja Matias Straume Mørland.

Matias Straume Mørland

Matias Straume Mørdlan seissoo kuvviin takana joka oon osa näyttelyy «Talviunen jälkhiin» Sokkelvikhusetissa Rässikäisessä. 

Foto: Nina Rantala Eriksen / NRK

Hän muistelee ette hänen kuvviin kautta publikumi saa nähđä millainen fästi kväänin kulttuuri oikheesti oon.

– Suurimassa osassa kuvissa oon aika paljon liikettä.

– Joissaki kuvissa met taas olema freistanu saađa esile tansin kaunheutta ja sitä yhtheispelii mikä tansin ja luonon välilä oon.

Matias Straume Mørland og M. Seppola Simonsen
Foto: Nina Rantala Eriksen / NRK
Talviunen jälkhiin

Kirjailiija M. Seppola Simonsen, valokuvvaaja Matias Straume Mørdland ja Tove Raappana Reibo Haltiin kväänisentteriltä tekkee näyttelyy valmhiiksi Stokkelvikhusetissa Raisissa.

Fra utstillingen «Talviunen jälkhiin».

Yksi näyttelyn monista kuvista.

Fra utstillingen «Talviunen jälkhiin».

Näyttelyssä oon myötä niin valokuvvii ette runnoi.

Luje tämä artikkeli norjaksi: – Ungdom skal få oppleve kvensk kultur på sin måte

Talviunen jälkhiin: Utstilling på Sokkelvikhuset i Sørsjosen.

Luođhaan areenan nuorile taitheiliijoile

– Ko met työtelemmä Paaskiviikon kans, freistaama met aina löyttäät uussii taitheiliijoita ja muita kulttuuri aktööriitä jokka halluu olla myötä tapattumaa, sannoo Tove Raappana Reibo.

Hän oon Haltiin kväänisentterin kieli- ja prosektityöteliijä, joka oon nyt kahđeksentoista vuotta arransseeranu kväänin kulttuuripäivii.

Tove Raappana Reibo

Tove Raappana Reibo

Foto: Nina Rantala Eriksen / NRK

Het kuitenki kojethaan ette se ei ole niin helppoo saađa nuorii myötä heiđän programhiin.

Siksi het päätethiin aloittaat prosektin Paaski Nuoret.

Prosektin moolina oli tuođa nuoret kväänitaitheiliijat ja paikaliset nuoret yhtheen jotta het yhđessä saattais hunteerata mitä se esimerkiksi meinaa olla kvääni.

Paaskiviikko 2024

Näyttely Talviunen jälkhiin avatthiin.

Foto: Nina Rantala Eriksen / NRK

– Nuoret saa kokkee kväänin kulttuurin omala tavala, sannoo prosektityöteliijä.

Tänä vuona prosektin tuloksenna oli kunstinäyttelyn lisäksi paikalisten koululaisten ja lasten kväänin teatteriroikan, Teatterilasten, luoma runopaja.

Lisäksi het dramatiseerathiin joitaki niistä kuvista, jokka oli myötä kunstinäyttelyy, «Talviunen jälkhiin.»

diktlesning av Andrea Albrigtsen Pedersen i Teatterilapset under åpning av kunstutstilling.

Tässä Andrea Albrigtsen Pedersen Teatterilapsista lukkee yhđen runoista. 

Foto: Nina Rantala Eriksen / NRK
Talviunen jälkhiin

Tässä lapset freistathaan dramatiseerata yhđen Matias Straume Mørlandin valokuvista. 

Foto: Nina Rantala Eriksen / NRK
Pressebilde til forestillingen Karhutanssi.

Tässä taas kuva mitä lapset freistathiin dramatiseerata.

Foto: MATIAS STRAUME MØRLAND / Pressebilde

Talviunen jälkhiin

Kuvat, jokka oli myötä näyttelyy, oon otettu Astrid Serine Hoelin tansiesityksen «Karhutanssi» yhtheyđessä.

Valokuvvaaja Matias Straume Mørlandin jälkhiin näyttely muistelee kunka kväänin kulttuuri nyt oon heräny pitkästä talviunesta ja kunka sitä nyt feirathaan.

– Itte tansiesitys oon kohđatellu tradittiinaalinen kväänin tansin ja uuđenaikhaisten tanssiin välilä. Myötä oon niin kväänin tanssaajii ette ei-kväänin tanssaajii, jokka luo yhđessä jotaki uutta, muistelee valokuvvaaja.

Talviunen jälkhiin

Valokuvvaaja Matias Straume Mørland ja kirjailiija M. Seppola Simonsen.

Foto: Nina Rantala Eriksen / NRK

Joissaki kuvissa met olema freistanu saađa esile tansin kaunheutta ja sitä yhtheispelii mikä tansin ja luonon välilä oon.

Matias Straume Mørland Valokuvvaaja

Kirjailiija M. Seppola Simonsen oon kirjoittannu runot jokka oon esilä valokuvviin kans.

Hän meinaa ette Talviunen jälkhiin oon passeli nimi näyttelylle, koska kväänit oon norjalaistamispolitikin jälkhiin uuđeleen määritellä mitä kväänin kulttuuri ja identiteetti oikhein oon.

– Tämä oon meiđän freistaus näyttää mitä kväänin kulttuuri oon, ja samala haastaa sitä, sannoo kirjailiija.

  • Kväänin identiteetistä ja identiteettimarkööristä praatathiin tämän vuođen Kvääniseminaarissa. Luje enämpi täältä.
Talviunen jälkhiin
Foto: Nina Rantala Eriksen / NRK

Tukkee nuorii taitheiliijoita

Tove Raappana Reibo muistelee että heilä oon ennen ollu myötä näyttelyitä jokka het oon tilanu, mutta tällä tavala nuoret taitheiliijat saađhaan kans appuu hakuprosessissa.

– Met tulema toistamhaan Paaski Nuoret joka vuosi uussiin taitheiliijoitten ja nuorten kans.

– Meiđän mooli oon saađa kashaan oma joukko taitheiliijoita, niin ette meilä oon aina mahđolisuus tarjota jotaki nuorile, sannoo Raappana Reibo.

– Oonko tämä vähän niin kuin taitheiliijoitten koulutusta?

– Joo, se oon jotaki mitä met saatama opettaat taithelijoile nyt ko tämän vuođen prosekti oon ohi. Se oon sikkaristi tapa auttaa nuorii taitheiliijoita.

– Se ette sie saatat lukkeet muitten hakemuksii samala ko sie itte haet rahhaa sinun kunstiprosekthiin saattaa olla todella iso apu.

En ung danser leter etter dansene som tilhører hennes eget folk, kvenene. Klarer hun å finne tilbake til den opprinnelige kvenske dansen?

En ung danser leter etter dansene som tilhører hennes eget folk, kvenene. Klarer hun å finne tilbake til den opprinnelige kvenske dansen?