Nicolaysen oli myötä ko minoriteettinuoret Norjasta, Ruottista ja Suomesta kohđatelthiin toisensa yhđessä Suomen Karjalan kylässä, Nurmeksessa, kesälä 2022. Möötin avula nuoret saathiin kans heiđän kolmen vuođen prosjektin Kolme viimen päätöksheen.
Hänen filmi prosjektin ympäri oon nyt valmis. Se makkaa YouTubessa ja sie saatat kattoot sen täälä.
Probleemii koronan takia
Prosjekti Kolme alkoi vuona 2019 ko Kvääninuoret sai siihen 70.000 euroo apurahan Pohjaismaitten ministeriraatista (suomeksi Pohjoismaiden ministerineuvosto).
Moolina oli vahvistaa minoriteettinuorten identiteettii ja yhtheenkuuluvuutta, ja järjestää kolme leirii kolmen vuođen aikana, missä kolme pohjaismaista minoriteettinuorisoroikkaa saattais kohđatella ja oppiit toisistaan.
Myötä oli Kvääninuoret, Met Nuoret ja Karjalaiset Nuoret Suomes.
Koronapandemian takia prosjekti kohtas kuitenki usheita probleemii, ja kvääninuorten ja tornionlaksolaisten nuorten leirii Norjassa ja Ruottissa ei saatettu järjestää.
Vuona 2022 prosjekti saathiin kuitenki viimen järjestettyy, ja noin 30 nuorta kokkoonuthiin viiđeksi päiväksi Kolme Kesäleirile oppimhaan karjalaisesta kulttuurista ja kielestä. Kvääninuoret nuorisotyöteliijä Kristine Jonas oli muun muassa myötä leirilä, ja sannoo ette se kaikki meni oikkein hyvin.
– Meilä oli fiini kokkoontuminen, sannoo hän.
Hän meinaa ette prosjekti kans sauttoi sen moolit: se nosti kontaktii minoriteettinuorten välilä ja vahvisti heiđän identiteettii. Niin meinaa kans filmintekkiijä Kristin Nicolaysen, joka oli myötä kärpäsennä katossa.
– Se oli fiini möötti ja antoi tođela paljon inspirasjuunii. Ja se oli soma nähđä kunka tärkkee se oli näile nuorile.
Hän toivoo, ette filmin kautta saattaa tuntteet, millainen meininki leirilä oli ja mitä sielä oikkein tapattu.
