Eurooppatinka meinaa ette Norja häyttyy pittäät paremppaa huolta sen kuuđesta minoriteettikielestä. Se tullee esile uuđessa raportissa, joka tinka pisti ulos tääpänä.
Se oon pohjaissaami, eteläsaami, lulesaami, kvääni, romanes ja romani jokka oon Norjan viraliset minoriteettikielet, ja joita minoriteettikielipakti suojelee.
Ko se koskee kväänin kieltä, meinaa Eurooppatinka muun muassa ette Norja häyttyy ottaat kväänin kieli enämpi esile sen meedioissa.
– Kielenpuhhuujhiin jälkhiin oon meediatarjous vieläki huono, ja se oon melkhein tyhä netissä. Se meinaa ette tarjous ei uletu vanhemppii ihmissii jokka praatathaan kieltä, seissoo se raportissa.
– Kvääninopetus häyttyy paranttuut
Ette meediatarjous saattaa ulettuu vanhiimet ihmiset, häyttyy se tulla enämpi raatio- ja TV-programii kvääniksi, meinaa Eurooppatinka. Se saattaa kans auttaa siinä ette kieltä pystythään paremin käyttämhään arjessa.
– Ja se kans anttaa päätösvallale enämpi syitä miksi het häyđythään varmistaat ette meediatarjous kans pyssyy hyvänä.
Pareman meediatarjouksen lisäksi Eurooppatinka meinaa ette kvääninopetusta häyđythään paranttaa perus- ja jatkokoulussa. Lisäksi kieli pittää olla paremin esilä lastentarhaissa.
Tääpänä peruskoulukoululaisila Tromssan ja Finmarkun fylkissä, joila oon kväänin/norjansuomalainen tausta, oon oikkeus saađa kväänin kielen opetusta, jos ainaki kolme oppilasta vaađithaan sitä.
Koulutusdirektoraatti (Udir) oon kuitenki anbefaalanu ette oikkeus häytyis koskee koko maata, ja ette koulut ei sais vaattiit kolmee oppilasta. Eurooppatinka oon sammaa mieltä direktoraatin kans.
– Jos usheemalla olis mahđolisuus oppiit kväänin kieltä, saattais se auttaa siinä ette kvääninkoulutus kans kehittyis paremaksi ja ette se saatais enämpi opettaajii.
Vaikka Udir oon anbefaalanu ette oppioikkeus häytyis koskeet koko maata ja joka oppilasta yksin, päätti Koulutusdepartementti kuitenki vuona 2021 ette oikkeus koskee tyhä oppilaita Tromssassa ja Finmarkussa.
Tääpänä opetusministeri Tonje Brenna (Ap) tullee kuitenki esittämhään uuđen ehđotuksen koulutuslajista, mutta se oon vielä epävarma kunka oppioikkeus tullee olemhaan myötä uuđessa lajissa.
NRK oon freistanu ottaat yhtheyttä departemanthiin, mutta ei vielä ole saanu kommenttii.