YouTube får skulda både for MTVs død og for å ha revolusjonert musikkvideoutrykket. Denne veka fyller nettgiganten fem år, og mange artistar bruker sida svært medvite for å uttrykkje ein meir personleg bodskap.
Bergensrapparen Lars Vaular er ein av dei som bruker YouTube aktivt for å marknadsføre seg.
— Eg kan gjere kva eg vil. Når det gjeld til dømes tv-kanalar, er det mange fleire ting ein må ta omsyn til, seier Lars Vaular.
- LES ÒG:
- LES ÒG:
Etter å ha eksistert i fem år har nettstaden langt på veg teke over MTVs rolle.
— Det har i alle fall gjeve mange eit spark i ræva til å finne fram til dei enkle, gode ideane igjen. Det er ikkje vits i å bruke så mykje pengar på å lage ein musikkvideo når uansett ingen ser på TV, synest Lars Vaular.
Form framfor innhald
Også direktøren i plateselskapet EMI Music Norway, Bjørn Rogstad, ser det positive i rolla YouTube spelar. Han meiner YouTube har vore med på å bryte ned det klassiske musikkvideo-idealet MTV har stått for.
— Frå MTV har det vorte sett sterke krav til kor dyr ein musikkvideo skal sjå ut. Kor profesjonell videoen ser ut, har alltid vore viktigare for MTV enn innhaldet, meiner Bjørn Rogstad.
— Tingen med YouTube, sosiale nettstader, og alle nye ting på nettet, er at dei legg veldig til rette for uavhengige folk. Det passar mykje betre for ein type som meg, seier Lars Vaular.
Suksessfaktor
YouTube kan også vere ein viktig faktor for ein suksessen til ein artist. Bjørn Rogstad fortel at dei i samband med lanseringa av Marit Larsens førre album lagde ein serie med YouTube-videoar, som var billege å produsere.
— Desse vart veldig raskt vart plukka opp av Perez Hilton, og vart dermed vår mest sette video på mange, mange, mange år, seier Rogstad.
I dag slepp Lars Vaular nok ein musikkvideo på YouTube.
— Eg har nokre musikkvideoar som er veldig enkle, som eg berre klipper sjølv, der eg eigentleg berre stel bilete. Så har eg litt meir ambisiøse videoar der vi filmar, og lagar skikkelege videoar, seier Lars Vaular.