Songaren Jenny Hval, tidlegare kjent som Rockettothesky, er aktuell med si tredje plate, «Viscera». Den skal ut i nesten heile Europa og USA, og no kjem det skryt frå uventa hald. Italienske Vogue, det mest kjende motebladet i heile verda, rosar Jenny Hval.
«Lyttar du til musikken hennar høyrer du ein artist med stor kompetanse, både intellektuelt og musikalsk. Når det gjeld karriera hennar har ho ikkje gjort nokon feilsteg. Akkurat no hyllar dei kulturelle prestisjetidsskrifta den iskalde, surrealistiske songaren. Ho har allereie oppnådd eit godt rykte i det chice musikkmiljøet» , som også dekkjer musikk.
Jenny Hval skal turnere i Europa og USA.
Foto: Morten Holm / ScanpixEuropeisk lansering
– Kjempegøy! Eg var litt overraska over at Vogue skreiv om plata mi, men syns dei presenterte den på ein veldig fin måte. Dei har forstått kva den handlar om, og bladet har svært kulturinteresserte lesarar, seier Jenny Hval til NRK.no.
Plata skal ut i Italia og resten av Europa i løpet av mai, og Hval har fått gode tilbakemeldingar frå fleire land. I mars var ho med i ei utgåve av det amerikanske musikkmagasinet The Wire.
– Det var stort, eg er fast lesar av The Wire og det er menneske eg føler eg kan kommunisere med. Eg har ikkje eit stort apparat rundt meg, men er opptatt av å nå ut internasjonalt og jobbar langsiktig med det, seier Hval.
Den tyske filmregissøren I.J. Biermann lagde musikkvideo med Hval då han var i Noreg for ei tid tilbake. Videoen blir også presentert på nettstaden til :
Mojo er interessert
«Viscera» skal ut i Storbritannia, USA, Tyskland, Italia, Frankrike, Danmark, Sverige, Spania, Portugal, Japan, Belgia, Nederland, Luxembourg, Austerrike og Sveits. Plateselskapet Rune Grammofon opplyser at spesielt fleire britiske magasin har etterspurt plata.
Verdskjende Mojo Magazine har bekrefta at dei vil melde plata når den kjem ut.
Neste veke skal artisten spele konsertar i Danmark og Nederland, og i mai reiser ho til Spania, der ho har spelt fleire gongar før.
Plata fekk gode kritikkar både i Sverige og her heime i Noreg. Fleire engelske journalistar nytta musikkbransjetreffet by:Larm i Oslo til å skrive om artisten.
Les også:
