I dag presenterte Dale of Norway VM-genseren for ski-VM i Oslo 2011. Sidan 1956 har Dale samarbeidd med Skiforbundet, og har til kvar ski-VM formgjeve ein strikkegenser.
Fleire kjende skiløparar var modellar på lanseringa av den nye VM-genseren, mellom andre Marit Bjørgen, Øystein "Pølsa" Pettersen, og Kjetil Jansrud.
Marit Bjørgen var ikkje nervøs for å vere modell for VM-genseren.
– Det skal nok gå bra. Det vert verre å vise seg fram i oppe Kollen i slutten av februar.
Tradisjonelle element
Blant publikum under lanseringa av VM-genseren 2011, var det også nokre moteekspertar.
– Eg synest genseren er tøff. Særleg unisex-modellen som gutane hadde på seg var fin. Den har alle dei tradisjonelle norske elementa som åttebladsroser, men den er samstundes litt meir funky, seier Marianne Jemtegård, redaktør i motemagasinet Vixen.
– Eg er einig, eg synest han var veldig fin, seier Petra Middelthon, moteredaktør i Elle.
– Liknar D&G
Dei synest Dale of Norway har lukkast i å lage ein genser som har klart å modernisere det tradisjonelle.
– Det er gøy at det liknar ganske mykje på det Dolce&Gabbana har vist på motemoloen i vinter. Ein synest kanskje det er dyrt å kjøpe ein Dale-genser, men det er billegare enn å kjøpe D&G i alle fall, seier Jemtegård.
- LES ÒG:
- LES ÒG:
Innan mote er det no ein tendes at ein vil tilbake til det ekte, og fleire hentar no inspirasjon frå Noreg, meiner dei to moteredaktørane.
– Kjem vi til å sjå dykk i ein slik genser til vinteren?
– Ja, det trur eg, seier Petra Middelthon.
– Eg ville gjerne ha hatt den litt lenger, slik at eg kunne bruke han som minikjole med ei belte i livet, seier Marianne Jemtegård.
Nøgde utøvarar
Skiløparane som skal bruke VM-genseren er også godt nøgde.
– Genseren er veldig fin, med fin passform, han klør ikkje, og han er veldig god å ha på. Når vi arrangerer meisterskap på heimebane bør vi sjå litt bra ut sjølv også. Då er det fint å få ein Dale-genser, så vi får vist oss fram og sjå litt bra ut, seier Marit Bjørgen.
Utøvarane trur det har ein del å seie for lagkjensla at ein har like genserar.
– Det gjer at ein kjenner seg meir som eit lag, også overfor andre, at ein står saman, seier Astrid Uhrenholdt Jacobsen.
– Det er så klart hyggjeleg å gå med eit norsk flagg i panna. Men det er ekstra hyggjeleg å vise noko litt særnorsk – å vise at det er vi som er nordmenn, og vi skal gje dykk juling, ler Øystein Pettersen.
VM-genser i over 50 år
Sidan 1956 har Dale stått bak alle VM-genserane til det norske skilandslaget. Og på lanseringa av den nyast utgåva var også nokre gamle heltar frå tidlegare VM på ski i Oslo på plass.
Skiløpar og gullvinnar frå Oslo-VM i 1982, Oddvar Brå og verdsmeister i skihopp under Oslo-VM i 1966, Bjørn Wirkola, har etter kvart fått ei solid samling Dale-genserar.
– Å vise at ein var frå Noreg var viktig, seier Oddvar Brå om tradisjonen med VM-genserar.
– Eg hugsar best den genseren frå VM i Innsbruck 1964, for det var min første, seier Bjørn Wirkola.
Men dei har ikkje noko imot at genserane har vorte litt meir moderne.
– Den nye genseren såg flott ut, og var faktisk litt meir behageleg enn dei gamle, seier Oddvar Brå.
- Kva synest du om den nye VM-genseren?