14 semifinalistar frå like mange land har i helga spelt for den internasjonale juryen i Eurovision Young Musicians – den norske konkurransen heiter Virtuos – og søndag vart Eivind Holtsmark Ringstad utropt som ein av sju finalistar.
Finalen går i Wien fredag 11. mai, og vert sendt på NRK1 kl 22.15.
Sjå i nett-tv: Den norske finalen
Finale framfor 40 000
Ringstad var den siste av semifinalistane som skulle i elden, og han spelte musikk av Johannes Brahms, Paul Hindemith og Carl Maria von Weber.
– Eg er kjempeglad, og gleder meg til finalen, sa den unge bratsjisten etter at finaleplassen var sikra.
Fredag kveld må han førebu seg på å spele for 40 000 på Rådhusplassen i Wien, saman med musikarar frå Armenia, Austerrike, Polen, Tsjekkia, Kviterussland og Tyskland.
– Alle i finalen på ekstremt høgt nivå
– Alle sju som har kome til finalen, er på eit ekstremt høgt nivå, seier Christian Eggen, som er Noregs representant i juryen.
– Det er som om dei har vore solistar på internasjonalt nivå i 20 år!
Konkurransen vert halden annakvart år, og Tine Thing Helseth og Eldbjørg Hemsing er mellom dei tidlegare norske deltakarane i den internasjonale finalen.
Sjå Eivind spele under den norske finalen:
– Har ein nesten skammeleg naturleg musikalitet
Då Eivind vann den norske Virtuos-finalen i mars, fekk han også med seg Den norske solistprisen på 100 000 kroner, og gjeve konsertoppdrag med Kringkastingsorkestret og under Festspillene i Bergen.
Les:
Kringkastingsorkestrets avtroppande sjefdirigent Thomas Søndergård dirigerte under den norske Virtuos-finalen, og var imponert over den unge solisten:
– Han har ein nesten skammeleg naturleg musikalitet i spelet sitt, med initiativ, klang og nerve. Han musiserer ærleg, og eg er sikker på at eg kjem til å jobbe meir med han i framtida, sa Søndergård etter finalen.
Eivind byrja å spele fiolin då han var fem år, og skifta til bratsj som 14-åring. No går han på musikklinja på Foss vidaregåande i Oslo, og på Barratt Due Musikkinstitutt.