Kolleksjonen som er laga i samarbeid mellom det italienske motehuset og den svenske gigantkjeda kjem ut hausten 2011 og vil vere signert Donatella Versace sjølv.
– Eg er kjempenøgd med å samarbeide med H&M og å få sjansen til å nå ut til deira store publikum. Kolleksjonen vil vere typisk Versace, perfekt for H&M- og Versace-fans verda rundt, seier Donatella Versace i ei pressemelding.
Deler design frå arkivet
Versace er eit av dei mest kjende luksusmotehusa i verda og har base i Milano. Det vart grunnlagt i 1978 av Gianni Versace, som revolusjonerte moteverda med modige, som regel svært utfordrande, kjolar og utbreidd bruk av ikon. Han stod mellom anna bak den ikoniske sikkerheitsnål-kjolen til Elizabeth Hurley.
Sidan 1997 har Donatella Versace sete i sjefsstolen for motehuset, etter at bror hennar vart skutt ned utanfor huset sitt.
(Artikkelen held fram under biletet)
Kreativ sjef i H&M, Margareta van den Bosch, er også nøgd med det eksklusive samarbeidet.
– Versace er eit av dei mest spanande merka i nyare tid. Donatella Versace deler ikoniske design frå Versace-arkivet med oss. Dette er ein kolleksjon perfekt for partysesongen, seier ho.
«The Iconic Collection» vil innehalde plagg både for kvinner og menn, samt interiørobjekt.
Marianne Jemtegård, redaktør i gratismagasinet Vixen, ser for seg ein overdådig stil, mykje gull, dyreprint og flotte kjolar. Men ho presiserer at ein ikkje må tru at ein kjøper ein ekte Versace-kjole.
– Plagga er designa av Versace, men held framleis H&M-kvalitet. Går ein ned i pris blir stoffa og kvaliteten deretter, sjølv om nokre av designsamarbeida til H&M ofte er prisa høgre enn vanlege H&M-plagg, seier ho til NRK.no.
(Artikkelen held fram under biletet)
Ville ikkje samarbeide
I 2008 uttalte Donatella Versace at det ikkje var snakk om at ho ville samarbeide med den svenske motekjeda.
– Eg respekterer alle som gjer det. Men grunnen til at eg ikkje vil det, er at eg jobbar svært hardt for å halde Versace-merket innanfor luksussegmentet. Eg trur det ville skape forvirring rundt merket dersom eg putta Versace inn i H&M, sa ho til New York Magazine.
Jemtegård meiner at Versace no likevel samarbeidar med H&M er eit uttrykk for kor stor makt kleskjeda har.
– Det er ein måte for Versace å nå ut til heile verda på, ikkje berre den eksklusive gruppa dei vanlegvis sel til, seier ho.
– Nokre av kjolane blir hengande igjen
Donatella har ikkje berre designa haustkolleksjonen, som blir sleppt 17. november i 300 utvalde butikkar og på Internett.
I tillegg har ho laga ein pre-vårkolleksjon som vil bli eksklusivt tilgjengeleg i land med H&M online-butikkar frå og med 19. januar 2012.
H&M har fleire gongar samarbeida med kjende designarar, mellom anna Karl Lagerfeld, Stella McCartney, Comme des Garcons, Jimmy Choo og Lanvin. Lanvin-kolleksjonen, som kom ut i fjor, var utselt i løpet av få minutt, melder Vogue. Fleire av plagga vart deretter selt for høge prisar på Ebay.
Jemtegård meiner suksessen til designsamarbeida har variert, ofte frå land til land.
– Nokre av kjolane blir faktisk hengande igjen på stativ i butikken. Kolleksjonane får mykje merksemd i starten, men så er det ikkje så stas når du ser 100 andre i same kjolen på fest, seier ho.
Men ho trur at Versace er eit så kjent merkenamn at denne kolleksjonen vil slå godt an i Noreg.