Urørt meinar
Mjukt og godt i øyrene: Ukas Urørt er mild, fin pop frå ein av Oslos sterke visepopjenter. Både amerikansk folk, latinsk lounge og Joni Mitchell har lagt igjen stjernestøv rundt Maria Dues arrangement på "Better Soon".
- Better soon var ei av dei aller første sangane eg lagde, seier Maria Due til Urørt når vi spør om historia bak vekas låt. - Men så har den fått litt ny tekst og nye delar etterkvart. Det er ein draum om sommarferie i Lillesand med lukt av bål og solkrem når ein sit i Oslo og les til eksamen, eller har andre grunnar til å drøyme seg vekk.
Erfaren korist og pianist
Maria starta med pianotimar som trettenåring og lytta heftig til foreldra sitt utval av fem kassettar. Særleg Leonard Cohens "Songs of Love and Hate" og Les Misérable.
Då ho var atten år starta ho som organist og korar i Kristiansand-bandet Bloody Pigeons.
Maria Due spelte under årets By:larm i Oslo.
- Eg spelte på eit orgel som vog omlag hundre kilo. Fem menn måtte hjelpe til å bære.
Då Maria flytta til Oslo spelte ho i fleire ulike band. I elektronikabandet Belle de Jour var ho vokalist og i indierockbandet Railroad Orchestra var det tilbake til tangentane igjen.
- Då kjøpte eg meg ein synth som gjekk an å ha i sekken, seier ho.
Maria, Maria!
Etter ei stund i Oslos mange musikkmiljø, blei Maria Due kjent med Maria Orieta. Due blei koristen og synthisten hennar. - Høgdepunktet var å varme opp for The National Bank på Rockefeller, mimrar Maria.
Etter å ha kora og syntha med andre, byrja Maria Due å lage sine eigne låtar ein sommar heime i Lillesand. Ho debuterte på Evita Klubb på Soria Moria for tre-fire år sidan også blei det jo By:larmspeling i februar.
Fekk platekontrakt på Sørlandsruta
Maria lagar pop, særleg med, som Urørtredaksjonen påpeiker, eit snev av Joni Mitchell mot slutten av "Better Soon".
- Joni Mitchell, Kate Wolf, Cat Power, Brigitte Bardot, Nick Drake og Belle and Sebastian har mange ulike, fine stemningar og er følsomme utan å bli sentimentale, seier Maria.
Maria trivst eksremt godt i Duper Studio i Bergen saman med supergjengen sin: produsent Yngve Sætre, bassist Bert Kristoffersen og trommis Ole Ludvig Kruger. - Det er som ei boble i himmelen!
Plateinnspeling fiksa ho seg ein gang ho sat på Sørlandsruta i fjor sommar. Ein mann med gitar og fyllenervar kom på. Dei to blei sitjande å prate om musikk og drikke raudvin i baksetet. Maria brann ein CD til fyren. Han likte det han høyrde og kontakta produsent Yngve Sætre.
Quartfestivalen i sommar
Maria Due skal bruke sommaren på det som står igjen av plateinnspeling. Men før den tid skal ho spele på Quartfestivalen. 26. april er det konsert på Youngstorget og 28. april på Javel.
Kva betyr det å bli Ukas Urørt?
- Kjempegøy! Eit steg nærmare popstjernehimmelen, svarar Maria.
Har du ein siste appell til folket?
- Ta meir ferie, dyrk ein ting i sommar, kjøp el-bil, bli vennar igjen og kom på konsert.
