Trur Emil Gukild er Draken – Dette svarer han

– Nå er det nesten så eg sjølv byrjar å tru at det er meg, seier Emil Gukild lurt.

Saman med modell, skodespelar og forfattar Tinashe Williamson er han gjest i torsdagens episode av Maskorama-podkasten.

Der skal dei finne ut av kven som er i dei attverande maskene i det som er haustens villaste gjetteleik. I tillegg kjem det eit nytt hint frå Bamsen.

Lite visste Gukild at han kom til å bli nemnt som potensiell kandidat – ikkje som Bamsen, men som Draken.

Gukilds hemmelege dobbeltliv?

Det er nemleg lyttar Heidi som er på sporet av Emil Gukilds moglege dobbeltliv som Draken. Ho har sendt ein e-post med oppsummering av hinta.

– Grotta er Emils studio. Comebacket er fordi han har drive «studentmoro og standup» der han har sunge, gjengir programleiar Sarah Natasha Melbye.

– Hinta viser til at han har gjort show før, og Emil har hatt show på Parkteatret, tilføyer ho og er undrande til om det faktisk stemmer.

På det svarer Gukild:

– Ja, alt stemmer. Men showet var på Parkteatret i Moss da, understrekar han og ler.

Som Draken har han reist verda rundt

Lyttar Heidi legg vidare vekt på at Gukild har reist verda rundt som sportsreporter. Vidare viser egget til Draken at han har vore med på rekordforsøk i eggknusing med hovudet.

– Det stemmer. Det var eit verdsrekordforsøk i Moss i 2012, konstaterer mossingen.

Ho nemner vidare at sløyfa på brystet til Draken viser til 17. mai-sløyfa då Gukild var programleiar for 17. mai-sendinga frå Skaugum.

Falken i bakgrunnen viser til at Gukild ei stund var ved Forsvarets flygeskole.

– Eg elskar merksemd!

Han bekreftar at dette stemmer, og legg til at han også har fått meldingar frå kollegaer og venar om dette:

– Grunnen til at eg fekk meldingar etter fyrste sending var på grunn av sjakkbrettet som vart vist, og eg har dekka sjakk, fortel han.

Han innrømmer at han likar spekulasjonane.

– Eg elskar merksemd! seier han og ler.

– Det skulle gjerne ha vore meg, men dessverre ... Eg trur det er Victor Sotberg.

Henrik Thodesen og nytt hint

Ingen blir heilt klok på kven Draken kan vere, men både Victor Sotberg og Henrik Thodesen er personane dei diskuterer om i episoden.

Tinashe Williamson, som kjenner Thodesen godt, trur han kan vere Draken.

– Han er veldig musikalsk og flink til å synge, seier ho og legg til at nær familie trur det same:

– Ein av foreldra hans hadde til og med sagt at «ein kjenner jo igjen stemma til sonen sin». Og det er jo vanskeleg å krangle på det.

Men det dukka også opp eit nytt hint.

«Sommer har gått»

Denne gongen var det Bamsen som har levert eit kort med teksten:

«Sommeren har kommet. Sommer har gått. Men Gud har gitt oss jordbær, og det er ganske rått.»

I tillegg ringer dei Abid Raja og Trine Rein som dei trur er Nissen og Nøkken. Finn ut kva Venstre-politikaren og artisten svarer her.

• Høyr meir om hinta dei går gjennom om kva dei kjem fram til i episoden.