Den amerikanske songaren Abigail Barlow elskar dialogen i Bridgerton. Og kunne ikkje la vere å syngje om historiene og karakterane etter at ho høyrde denne linja:
Ho synest den var utruleg og blei med ein gong inspirert.
– Der har vi ein song! Eg gjekk rett til pianoet, sette opp eit kamera og starta å skrive, fortel Barlow i eit intervju med BBC Radio 4.
Suksesserien Bridgerton
Serien Bridgerton, som kom ut fyrste juledag er basert på historiske romanar skrive av Julia Quinn. Det handlar om ei enke med åtte born som navigerer seg gjennom det turbulente livet i sosieteten i London på starten av 1800-talet.
Dei tre fyrste vekene etter at serien kom ut var det heile 63 millionar hushaldningar som benka seg framføre skjermen for å sjå det fargerike periodedramaet.
Bridgerton er på femteplass over dei mest populære originalseriane på straumetenesta Netflix noko sinne. Den er også på topp-ti-lista i nærare 80 land.
Musikalsong spreidde deg som farsott
Artisten Abigail Barlow forklarer at ho blei inspirert til ein heilt ny level av kreativiteten i Bridgerton. Ho har skrive eigne små stykke som kunne passa inn om Bridgerton var ein musikal.
– Dette er noko som hadde passa på ei scene, så då publiserte eg videoen på TikTok som eg brukar å gjere med pop-songane eg lagar.
Låtane har blitt spelt av fleire millionar gongar på TikTok. I kommentarfelta uttrykkjer fleire at dei ønskjer å høyre meir.
Under er Barlow sin eigen musikal-versjon av ei scene i Bridgerton.
Drøymer om musikal
Barlow har inspirert folk verda over til å vere kreative under emneknaggen «bridgertonmusical».
Låten «Burn for You» handlar om kjærleiksforholdet til hovudrollene Simon og Daphne. Til den låten kan andre TikTok-brukarar leggje inn sine eigen vers ved å bruke duett-funksjonen til appen.
No er planen å produsere eigne låtar for karakterane Penelope og Eloise. På sikt drøymer Barlow og samarbeidspartnaren Emily Bear om at det skal bli ein fullskala produksjon.
Dei har store planar om at musikalen kan bli sett opp på Broadway og West End når pandemien er over.
Tidlegare i år blei det laga ein musikalversjon av filmen Ratatouille på TikTok. Etter at den samla eit stort publikum, gjorde dei det om til ein virtuell konsert der dei samla inn om lag 2 millionar dollar til amerikanske skodespelarar.