Nærmare 7000 billettar til konserten på Operataket i kveld er utselde. For første gong står Åge Aleksandersen, svenske Mikael Wiehe og danske Kim Larsen på same scene. Dei har spelt saman i ulike konstellasjonar før, men har aldri stått saman på èi scene.
– Eg har høyrt Kim Larsen spele, men har aldri treft han. Eg er veldig interessert i at vi på dette« trekongerstreffet» i Oslo får eit bilete av oss tre saman, seier Mikael Wiehe til NRK.
«Til ungdommen» i 1988
Saman med Åge Aleksandersen møter han pressa på Operataket, medan Kim Larsen ikkje vil la seg intervjue. Dei tre har til saman ei fartstid på 120 år i musikkbransjen, og er kjent for sitt politiske engasjement.
Aleksandersen har samarbeida med Kim Larsen tidlegare, om ein song som vi no knyt opp mot 22. juli: «Til ungdommen».
Sjå videoen øvst i saka.
«Til ungdommen» vart ein viktig song i dagane og året som har gått etter 22. juli 2011. Han er blitt sunge ved minnemarkeringar, gudstenester og gravferder.
Åge Aleksandersen og Kim Larsen framførte Nordahl Grieg-songen allereie i 1988, saman med Jahn Teigen og Bjørn Afzelius på Momarkedet.
– Det eg hugsar var at det var eit ganske avansert prosjekt på management-sida for å få det til å gå i hop. Og eg var vel ikkje den vanskelegaste å ha med å gjere, smiler Aleksandersen.
– Det blei «Til ungdommen» i Kim Larsens arrangement. Og det vart heilt OK.
SJÅ INTERVJU:
Spelar «En sång till modet»
Mikael Wiehe spelte under minnemarkeringa på Utøya 22. juli i år, framfor statsministeren, medlemer av Regjeringa, AUF-arar og andre berørte. Spesielt «En sång till modet» gjorde inntrykk på tilskodarane.
– Det er klart at eg spelar «Ein sång till modet» i kveld. Den høyrer heime i Noreg no. Det er songens nye heimland, seier Wiehe.
LES:
– Kva betydning har politikk for dykk?
– Politikk handlar om kven som skal ha makta: Eliten eller folket. Folket, syns eg, meiner Wiehe.
– Det er ein del av livet mitt. Eg bur i denne verda her, og det er viktig å vere opptatt av det, seier Åge Aleksandersen.
Så spørs det om dei igjen vil spele «Til ungdommen» - denne gongen med ei ny betydning.
HØYR MIKAEL WIEHE PÅ UTØYA: