Peter Ramsauer skriv i ei helsing på «Adagio im Auto»-nettsidene at trafikkpsykologar har påvist korleis høg, aggressiv musikk har negativ innverknad på korleis ein køyrer. Klassisk musikk kan på si side dempe aggresjon og bidra til avspenning, meiner Ramsauer.
Ramsauer er utdanna bedriftsøkonom og møllemeister, og vart utnemnd til samferdselsminister i Angela Merkel si andre regjering hausten 2009.
I tillegg er han ivrig amatørmusiker, og på den nye cd-en «Adagio im Auto» – «Adagio/langsamt i bilen» – speler han andresatsen frå Mozart sin berømte klaverkonsert nr. 21. Med på cd-en er også dei berømte tyske pianistane Christoph Eschenbach og Lars Vogt.
Sjå video frå innspelinga av cd-en, og høyr Ramsauer spele:
– Bilen er som ein dansepartner for unge
Dagfinn Moe, seniorforskar innan transportforsking ved SINTEF, er ikkje i tvil om at musikk kan påverke køyringa, særleg for unge sjåførar.
– Vaksne har generelt lettare enn ungdom for å skilje mellom det dei høyrer og det dei gjer, difor er dei flinkare til å handtere musikk i bilen, seier Moe til NRK.no.
– Musikken er først og fremst ein del av den opplevinga mange unge sjåførar er ute etter. Dei elskar å blande bilkøyring, gode vener og høg musikk, særleg med heftig bass. Dei tunge rytmane gir ei dansekjensle der bilen er dansepartneren. Det fører igjen til at sjåføren vert villig til å køyre fortare.
Les:
Sjå Brennpunkt i nett-tv: Råest bak rattet
– Kjem an på om ein likar musikken
Dagfinn Moe viser til ein svensk rapport om musikk og bilkøyring, der det mellom anna kjem fram at klassisk musikk kan ha ein avslappande effekt på sjåføren. Det mest avgjerande er likevel den individuelle musikksmaken, og Moe er ikkje sikker på om klassisk musikk vil vere til nytte for unge sjåførar:
– Kva effekt musikken har, kjem jo veldig an på om ein likar den eller ikkje, seier Moe.
– Dessutan er jo klassisk musikk veldig forskjellig – den kan til dømes vere veldig rytmisk og intens. Musikk som er oppkvikkande og set sjåføren i god stemning, vil sikkert fungere bra. Og Mozart vil nok ikkje ha same effekt på dei unge sjåførane som tunge rytmar.
Les:
Vil undersøkje om musikk kan forstyrre
SINTEF-forskaren vil ikkje anbefale folk å bruke musikk som er altfor avslappande i bilen:
– Viss du er trøytt, kan du sovne til kva som helst. Musikk som er er laga for å vere særskilt beroligande, til meditasjon og liknande, er nok likevel ikkje å anbefale.
Ein ting seniorforskar Moe gjerne skulle undersøkt nærare, er om musikk i bilen også kan forstyrre og gjere sjåføren mindre merksam på kva som skjer rundt seg.
– Forsking har tydeleg påvist at ein engasjerande samtale kan ta bort merksemda frå køyringa og påverke dei visuospatiale ferdigheitene – evna til å vurdere avstandar, vinklar, retning og så vidare. Det hadde vore veldig interessant å finne ut om musikk kan ha same verknad. Vi har køyresimulatorar og utstyret som skal til, men vi treng i så fall sponsorar!
Les:
Høyrer gjerne Brahms eller Beatles i bilen
Dagfinn Moe likar også å høyre musikk i bilen, men det er ikkje like viktig for han som før:
– Før var eg svært oppteken av å ha eit gigantanlegg i bilen, men no er det først og fremst heime eg lyttar til musikk, seier trafikkforskaren, som nyleg fylte 60.
– I bilen går det mest i gode, harmoniske låtar med stødig og grei pop og rock, tidleg Beatles er til dømes utmerka. Klassisk musikk blir det helst på lengre bilturar der eg køyrer åleine. Årstidene av Vivaldi, til dømes, eller ein klaverkonsert – Grieg sin i a-moll eller klaverkonsert nr. 2 av Brahms.
Høyr andresatsen frå Johannes Brahms sin klaverkonsert nr. 2:
(Nelson Freire er solist på klaver, Leipzig Gewandhaus-orkester vert dirigert av Riccardo Chailly.)