– Noreg er jo ein lilleputt i forhold til Sverige, og det har vi vore ei god stund no, seier spelekspert Audun Rodem.
I kveld går Nordic Games Awards av stabelen. Her blir den nordiske spelbransjen feira, og det blir delt ut prisar til dei beste spela i ulike kategoriar.
Men medan norske spel har fått fem nominasjonar, har svenskane fått femten – altså tre gongar så mykje. Noreg har altså ein lang veg å gå før vi når opp til storspel-makta Sverige.
– Vi har 300 sysselsette spelutviklarar i Noreg, mot Sverige sine 8000. Det gjev så klart utslag, seier Rodem.
– Kjempestor ære
– Det er fyrst og fremst ei kjempestor ære. Nordic Games Award er kjent for å vektleggje kunstnariske, nytenkande spel på kostnad av dei store tunge Hollywood-produksjonane, seier Jon Cato Lorentzen.
Han er dagleg leiar i Krillbite, og har vore med på å utvikle eventyrspelet Mosaic. Spelet handlar om lengselen etter å sleppe seg laus frå mobilen og ein meiningslaus arbeidsplass – og har fått to nominasjonar til Nordic Game Awards.
Lorentzen meiner utdelinga er viktig for at spelnasjonen Noreg skal utvikle seg.
– Det at ein kvart år kårar dei beste spela frå Norden er kjempebra, for då får vi konkurrere mot gigantiske svenske selskap.
– Vil få ein gedigen vekst
Rodem trur litt av grunnen til at Noreg framleis heng etter er fordi det har vore vanskelegare for norske utviklarar å hente investormidlar.
Men han meiner at fem nominasjonar vitnar om ein norsk bransje i framgang:
– Det er jo kjempebra. Og det kjem som ein direkte konsekvens av at vi hadde ein del spel-lanseringar i fjor. Vi ser at det kjem fleire og fleire norske spel i løpet av eit år.
Jon Cato Lorentzen er audmjuk med tanke på Mosaikks vinnarsjansar i kveld. Men han har stor tru på Noregs framtid som spelnasjon.
– Vi er små, men vi har store ambisjonar om å vekse. Det er såpass mange spennande prosjekt i Noreg no at eg er overtydd om at vi vil få ein gedigen vekst dei neste fem åra.