På heimesidene til Framstegspartiet ligg ei
som oppsummerer partiets kulturpolitiske standpunkt, med sterk kritikk av mellom anna auka statlege løyvingar til kultur.I fleire tiår har motstanden mot byggjinga av Den norske opera - tidenes største norske kulturbygg - vore ei viktig fanesak for partiet.
Men pussig nok, er heile framsida av dokumentet pryda av eit prangande bilete av Den norske opera.
Ordknapp kulturtalsmann
Kulturpolitisk talsmann i partiet, Ulf Erik Knudsen, visste ikkje om biletbruken, og blir overraska når NRK kan fortelje han om dette.
- Dette må vere tilfeldig. Eg ser på det som ein rein kuriøsitet. Utover det vil eg ikkje kommentere dette.
- Er det ikkje rart å fronte dykkar kulturpolitikk med eit prosjekt de har vore så sterke motstandarar av?
- Eg vil ikkje kommentere dette.
Framleis mot Operaen
Ansvarleg redaktør for frp.no, Geir Mo, meiner Operaen er ein passande illustrasjon.
- Vi var på jakt etter ein god illustrasjon på kultur, og då nyttar vi sjølvsagt noko folk kjenner att. Dette er ei søkt problemstilling.
Mo meiner heller ikkje det er problematisk å fronte partiets kulturpolitikk med bilete av ei tapt sak.
- Har de tatt innover dykk at Operaen har blitt meir folkeleg enn de først trudde?
- Vår kulturpolitikk handlar om kva vi meiner skattepengane skal nyttast til. Vi meiner operaprosjektet var feil før det blei bygd, og er feil no. Denne illustrasjonen har ingen påverknad på dette.
- For folk flest
Informasjonssjef Sverre Gunnar Haga ved Den norske opera, frydar seg over gratisreklamen.
- Nydeleg. Dette er kjempeflott. Frp var i si tid ein verdig diskusjonspartner, så vi vil ikkje hovere over dette. Men stort er det - veldig mykje meir enn dersom dette kom frå eit anna parti.
Haga meiner Frp no truleg har sett at turisttrafikken vil betale ned bygget innan ti år, og nyttar anledninga til å ønskje alle Frp-arar velkomne til Operaen.
- Dette beviser berre at opera og ballett har blitt for folk flest.