Forholdet mellom Tyra Banks og Erik Asla frå Drammen skal ha teke slutt i vår, etter at dei hadde vore eit par i fem år.
Asla stadfestar brotet i ein sms overfor VG:
– Vi kan stadfeste at vi gjekk våre eigne vegar i vår. Vi har det begge kjempefint, og fokuserer på rollene som foreldre, skriv han.
Det var den amerikanske kjendisnettstaden Page Six som først kunne melde at det var slutt, men dei fekk ikkje nyheita stadfesta av paret. Men ifølge nettstaden er dei framleis vennar og jobbar saman.
Erik Asla skal blant anna vere aktuell som fotograf i «America's Next Top Model», der Tyra Banks skal vere programleiar.
Babylykke og Skavlan
Asla og Banks fekk sonen York via surrogatmor i januar i fjor. I oktober i fjor gjesta dei Skavlan då han sende frå New York. Der snakka dei blant anna om korleis det er å vere foreldre, og korleis det var å arbeide saman, samtidig som dei var eit par.
– Det er annleis, men herleg. Vi kan vere ærlege overfor kvarandre og gi kvarandre tilbakemeldingar vi ikkje kunne ha gjeve til andre, sa Banks.
Dei møttest på jobb, men det tok litt tid før dei forsto at forholdet var noko meir enn berre profesjonelt.
– Eg trur det var under den tredje middagen, ikkje daten, men middagen det skjedde noko som gjorde at det blei oss, fortalde Asla.
