Slå kjendisane i «Grevinnen og HOPPmesteren»

– Dette her er min fyrste gong. Eg har aldri spelt mobilspel før, eg har berre lagt kabal på iPaden, seier Rune Gokstad.

– Men Øystein er som skapt for dette her. Du er jo vand til å sitte på kveldstid med noko innanbords ved ein datamaskin, seier han ertande til kollega Øystein Bache.

Vi kjenner alle til hovmeisteren James og grevinna Miss Sophie som samlar seg på Miss Sophies 90-årsdag.

Kvar vesle julaftan møter vi dei imaginære venane Sir Toby, Admiral von Schneider, Mister Pomeroy og Mister Winterbottom, og vi ler oss skakke av James som blir fullare og fullare jo lenger ut i middagen vi kjem.

Jo fullare jo vanskelegare

Dette er ein av våre kjæraste juletradisjonar i Noreg, og har blitt sendt på NRK kvart einaste år sidan 1980.

I år er inkje unntak. Og nå får du også sjansen til å prøve deg som hovmeisteren James i spelet «Grevinnen og HOPPmesteren»!

Her skal du få hovmeisteren James til å hoppe over så mange skinnfellar som mogleg – men jo meir drikke hovmeisteren får i seg jo vanskelegare blir det.

Vi har latt ni NRK-profilar prøve seg. Klarer du å slå dei? Prøv her.

– Vi kjem til å liggje langt nede

– Eg trur vi kjem til å liggje ganske langt nede. Eg trur det finst folk som har større konkurranseinstinkt enn oss, seier Adelina Ibishi, programleiar i P3morgen.

Ho klarte 29 skinnfeller med 9 alkoholeiningar innanbords, såvidt slått av radiomakker Martin Lepperød.

– Det er det som er gleda med eit mobilspel, nemleg at det kan gi så store kjensler. Eg har akkurat hamna i kjellaren fordi eg trudde eg vart slått.

– Men så tapar Adelina på 29, brølar han.

– Blir veldig sint

Karsten Blomvik frå 4. ETG kjenner også på dei store kjenslene.

– Eg var god til å game før, men eg har ikkje spelt så mykje mobilspel, for eg blir så veldig sint når eg ikkje gjer det bra, seier han.

Han klarer 28 skinnfellar, og må godta nederlaget for kollega Annika Momrak – ho klarer 33 skinnfellar.

Mikkel Niva er derimot den som leiar med 43 hopp.

Blomvik er sugen på revansj.

– Eg skal ikkje gjere noko anna i jula. Eg skal ikkje feire med familien min, eg skal ikkje sjå noko anna enn «Grevinnen og hovmesteren» og spele det spelet her, seier 27-åringen.

– Får høg puls

Nedst på tabellen ligg altså «Julenøtter»-medprogramprogramleiaren Rune Gokstad.

– Eg må ærleg innrømme kvifor eg ikkje driv med dette. Eg får jo høg puls, og det skal ein vere forsiktig med i min alder, humrar 63-åringen Rune.

Han og Øystein Bache er likevel begge fornøgde med sine personlege rekordar på høvesvis 19 og 25 skinnfellar.

– Skal vi gi oss på topp eller? spør Øystein.

– Skal vi gå og ta oss ein skarp ein? foreslår Rune.

– Det synest eg vi skal gjere.

PS 1: Sjå «Grevinnen og hovmesteren» i «Kvelden før Kvelden» på NRK 1 og på NRK TV kl. 21.

PS 2: Lurer du på kven du er i «Grevinnen og hovmesteren»?

• Ta denne uhøgtidlege personlegdomstesten og få endeleg svar på kven du liknar mest på i denne klassikaren over alle klassikarar.