Programmet Mobilfotografene startar i haust. Seks utvalde deltakarar som tek mykje bilde med mobil vil få tips frå Norge sine beste fotografar. Deltakarane og sjåarane skal lære korleis ein kan gå frå å ta bra, til fantastiske bilde.
Vil inspirere
Vinnaren av fotokonkurransen vil få ei fotoreise. Dei som ser på vil også kunne plukke opp mykje på vegen, seier prosjektleiar Ingerid Nordstrand:
– Visjonen er at sjåarane skal få tips og inspirasjon til korleis ein med mobilkamera skal kunne fange magiske augneblikk. Det er berre små grep som skal til og Noreg sine fremste fotografar vil vise ein dette, fortel Nordstrand.
Nytt fjes
Programleiar for serien blir Misgina Ghebremeskel som til vanleg driv ein bar i Oslo. Dette er første gongen han jobbar i TV:
– Dette er noko eg aldri har gjort før. Eg syns det er fett at NRK gjekk for ein som aldri har vore på skjermen før. Eg er utruleg spent og gleder meg til utfordringa, seier Ghebremeskel.