Den internasjonale filmfestivalen i Berlin vert i dag opna for 60. gong. I føremiddag heldt juryen som avgjer kven som vinn Gullbjørnen og dei åtte Sølvbjørnane, ein pressekonferanse.
- LES ÒG:
- LES ÒG:
Regissør Werner Herzog er leiar for juryen som i tillegg er sett saman av den italienske regissøren Francesca Comencini, den somaliske forfattaren Nuruddin Farah, den tyske skodespelaren Cornelia Froboess, den spanske produsenten José Maria Morales, den kinesiske skodespelaren Yu Nan og den Oscar-vinnande amerikanske skodespelaren Renée Zellweger.
Kva er ein god film?
Fleire spørsmål vart stilt om kva jurymedlemmane synest kjenneteiknar ein god film. Blant alle medlemmane var det stor semje om at det er umogeleg å setje faste kriteria for kva som utgjer ein god film.
- Kva som er ein god film for meg er vanskeleg å seie. Ein føler om filmen er god, om han er sann. Ein god film berører og inspirerer, svarte den amerikanske skodespelaren Renée Zellweger.
Zellweger la også vekt på at ho sette pris på litt smalare filmar, fordi filmar som er litt annleis ofte er dei som gjev aller størst inntrykk.
- LES ÒG:
Dei sju jurymedlemmane kjem frå ulike bakgrunnar, noko som gjer juryformann Herzog sikker på at dei vil klare å kome fram til verdige vinnarar.
- Det er eit stort ansvar og ei stor ære å vere jurymedlem. Det viktigaste vert å vere konsentrert, og møte filmane utan fordommar, uttalte Francesca Comencini på pressekonferansen.
- Å sitje i juryen er eit stort ansvar. Det tek lang tid å lage ein film, og det må ein ha i tankane før ein gjev ein dom, sa Jose Maria Morales.
Plattform for filmskaparar
Juryformann Werner Herzog meiner at filmfestivalen er ein viktig plattform for unge filmskaparar, og at det har vore ein viktig festival for han. Herzog trekte spesielt fram at unge perunske Claudia Llosa fekk Gullbjørnen for Faustas perler i 2009, og at dette var ein viktig pris for heile Peru.
Jose Maria Morales var produsent for nettopp Faustas perler, i år er han tilbake på Berlinalen som jurymedlem.
- For meg er dette ein draum som byrja i fjor. Det er ei gåve å få kome hit. Det var supert å vinne ein Gullbjørn i fjor, og no er vi nominerte til Oscar, sa Jose Maria Morales.