Tusvik: – Blei drapstruga etter abort-protest

I den nye «Tusvik & Tønne»-podkasten les Sigrid Bonde Tusvik opp ei melding ho har fått der ho blir truga med kniv og hagle.

Sigrid Bonde Tusvik

Sigrid Bonde Tusvik er ofte godt synleg både som komikar og samfunnsdebattant. Førre veke fekk ho ei melding der ho blei truga på livet om ho ikkje heldt ein lågare profil.

Foto: Kaja Marie Andreassen / NRK

Komikaren Sigrid Bonde Tusvik har vore godt synleg i samfunnsdebatten den siste tida. Etter utdelinga av Humorprisen reagerte ho på at ingen kvinner fekk pris. Og tysdag møtte ho opp framfor slottet saman med 29 andre kvinner kledt i raude «Handmaid's Tale»-kapper for å protestere mot endringar i abortlova.

I podkasten «Tusvik & Tønne» seier Tusvik at ho har fått mange tilbakemeldingar i veka som har gått. Men det var særleg ei melding som fekk henne til å bli redd.

Tusvik seier i podkasten at ho nokre timar før ho skulle på scenen torsdag fekk ein SMS frå eit svensk nummer. I meldinga stod det at ho burde passe seg:

«Kanskje det er på tide du begynner å halde kjeft om ting du ikkje har noko med. Eg veit kvar du bur, og har både kniv og hagle. Du burde halde deg langt unna offentleg heita», les ho frå meldinga.

Handmaids

Då regjeringa blei presentert tysdag i førre veke, møtte Sigrid Bonde Tusvik opp saman med 29 andre kvinner for å protestere mot endringar i abortlova. Dei var kledde i raude kapper slik kvinnene i TV-serien «Handmaid's Tale» har.

Foto: Heiko Junge / NTB scanpix

Meldt til politiet

Tusvik seier ho blei redd sidan ho kort tid etterpå skulle stå på scenen og underhalde. Samtidig var barna hennar heime med barnevakt.

– Trugsmålet trefte meg der og då. Eg fekk hjartebank og raudt utslett.

Tusvik seier ho kontakta politiet som var klare på at dette var eit alvorleg trugsmål. Ho seier dei også kopla inn svensk politi som prøvde å få tak i vedkomande som hadde sendt henne meldinga.

Sigrid Bonde Tusvik seier ho skreiv melding til politiet same natt, som ho leverte på politistasjonen fredag. Politiet vil verken stadfeste eller avkrefte at det har kome ei slik melding.

Tusvik og Tønne

«Tusvik & Tønne» har bygd seg opp til å bli ein av dei mest populære podkastane i Noreg. På biletet fekk dei pris for «Årets podkast» under Kjendisgallaen i 2016.

Foto: Jon Olav Nesvold / NTB scanpix

Blei redd

Showet torsdag blei gjennomført som normalt, men det var ubehageleg å stå på scenen når ein ikkje visste om det var nokon i salen som ville henne noko vondt, seier Tusvik i podkasten.

Det blei leigd inn ekstra vakthald den kvelden, og alle som hadde løyst billett måtte sjekkast før dei fekk kome inn.

Tusvik seier politiet oppmoda henne også om å flytte barna same kveld.

– Då dei sa eg måtte flytte barna, blei eg ekstra redd. Dei sa indirekte at eg ikkje var trygg heime. Eg fekk ikkje hjartet til å slutte å banke.

NRK har vore i kontakt med Sigrid Bonde Tusvik som seier ho ikkje ønsker å seie meir om saka enn det ho seier i podkasten.

Kulturstrøm

  • Kanye snakket om «presidentkallet»

    I et tre timer langt radiointervju hos Joe Rogan snakket Kanye West om sitt kall etter å bli «lederen av den frie verden». Han kom også med udokumenterte antydninger om at Bob Marley, Michael Jackson og Prince hadde blitt drept, melder Variety.

    Kanye West
    Foto: ANGELA WEISS
  • Fremtidens kunst

    Norsk kunstner tjente mer på 8 måneder enn på 10 år. Ny teknologi og digitale kunstauksjoner har gjort det mulig å nå kunstsamlere over hele verden.

    Digital kunst omsettes for millioner – norsk kunstner tjente mer på 8 måneder enn på 10 år