Sex Pistols-konserten «alle» var på

20.juli 1977 spelte Sex Pistols på Pingvin Club i Oslo. Berre 200 menneske fekk plass, men det er langt færre enn dei mange som i ettertid har skrytt på seg at dei var der den kvelden.

– Det er mange som skryt av det etterpå, vi hadde fylt Ullevål stadion viss alle som påstod dei var der, verkeleg hadde vore der, seier Thor Rune Haugen, rockegeneral i NRK på 80- talet.

Enorm merksemd

No har ein av de mest omtalte konsertane i norsk konserthistorie fått plass mellom to permar. Boka Banned in the UK - Sex Pistols exiled to Oslo 1977 er skrive av Trygve Mathiesen, med hjelp frå Harry Nordskog. For at også utanlandske lesarar skal få ta del i Sex Pistols sitt Oslo-besøk, er boka skriven på engelsk.

I 2007 gjekk forfattaren ut og etterlyste publikum som var til stades på konserten , for å få førstehandsskildringar av opplevinga.

Ein av dei som i ettertid har bevis på at han var til stades var Herodes Falsk.

– Eg er ein av dei som ikkje har gidde å sagt at eg var der, fordi det nesten har kjentest flaut å vere blant alle dei folka som berre påstod at dei hadde vore der, seier Herodes Falsk.

• LES ÒG: - Tek ein stor sjanse

Til å vere ein konsert for så få, har hendinga fått enormt mykje merksemd. Ein av dei som er fascinert over konserten er teikneserieforfattar og manusforfattar Christopher Nielsen. Hans stykke "Hustyrannen", handlar mellom anna om ein mann som hevdar at han var på Pingvin Club i 1977.

Kartlegging av publikum

Men no kan alle dei som heile tida berre har påstått å ha vore på Sex Pistols-konserten, som i Hustyrannen, få eit forklaringsproblem. I arbeidet med den ferske boka om konserten, har Trygve Mathiesen prøvd å spore opp alle dei som verkeleg var til stades.

– 214 har eg funne. Det har vore så mange mytar omkring det, og så mange som har skrytt det på seg. Så det har vore ei utfordring, og kjempespanande oppgåve å kartleggje alle som var der, seier Mathiesen.

Boka skildrar heile døgnet Sex Pistols var i byen. Mathiesen meiner Sex Pistols- konserten kanskje er den viktigaste i Norge nokon gong, og at han endra byen for alltid.

Herodes Falsk fortel om korleis han opplevde dagen, saman med ven og kollega i bandet Prima Vera, Jahn Teigen.

– Det var bra stemning. Eg hugsar at noko spytta og slikt, og at Sid Vicious gjekk og slo litt rundt seg med bassen, det var slik det skulle vere, fortel Herodes Falsk.