Unescos verdsarvkomité, som er samla til årsmøte i Fuzhou i Kina, gav tysdag verdsarvstatus til dei over 7000 år gamle mumiane i Chile.
Mumiane er over 2000 år eldre enn dei egyptiske mumiane. Det er funne over 300 slike chilenske mumiar, som blir rekna som svært godt verna.
Tyske gamlebyar
Komiteen gav òg verdsarvstatus til historiske jødiske sentrum i Tyskland. Det gjeld dei tyske byane Mainz, Worms og Speyer som var jødiske kulturelle sentrum i mellomalderen og blir omtalt som «Jerusalem ved Rhinen».
Ein ny del av grensene til det romerske imperiet vart òg innlemma på den prestisjefylte lista. Ein del av grensa fekk verdsarvstatus allereie i 2005. Den delen som no får verdsarvstatus, strekkjer seg frå Rheinbrohl og fram til kysten nord i Nederland.
Den franske badebyen Nice får verdsarvstatus for den urbane byplanlegginga si som strekkjer seg to hundreår tilbake, ifølgje Unesco.
Mexico og Peru
Tlaxcala-katedralen i Mexico er ein av dei første som vart brukt til å konvertere urinnvånarar til kristendommen då europearar kom til kontinentet.
I Peru fekk Chanquillo-observatoriet, som er 2300 år gammalt og ligg på ein topp 400 kilometer nord for Lima, verdsarvstatusen.
Sist veke tok Unesco opp 11 historiske spabyar i sju land på verdsarvlista, som no famnar 1135 stadar med særs stor kulturell eller naturgitt verdi.
51 stadar står i fare for å ryke ut av lista. Tre stadar er tatt ut av lista.
Les òg: