I fjor var det 11 filmar på norske kinoar som fekk merkelappen «romantikk». Det er nesten ei halvering frå toppåret 2011 med 21 slike filmar. Det viser tal frå bransjeorganisasjonen Film & Kino.
Ein grunn til nedgangen kan vere at filmbransjen tenker pengar. Kritikarroste romantiske filmar som «Brooklyn», «Love» og «Mine beste dager» er langt nede på lista over dei best besøkte filmane på norske kinoar for tida.
Action og superheltar dominerer
På den lista er det action- og eventyrfilmar som «The Revenant», «Star Wars» og «The Hateful Eight» som dominerer. No i Valentines-helga var det actionfilmen «Deadpool» som flest løyste billett til.
Filmmeldar Marthe Hedenstad i Filmpolitiet her i NRK meiner det er gutane som får velje film når dei skal på kino med kjærasten:
– Jenter kan godt så såkalla «gutefilmar», medan gutar ikkje ser såkalla «jentefilmar». Difor er publikumsgrunnlaget for actionfilmar, science fiction og superheltfilmar breiare enn for romantiske komediar og drama.
Og vi ser trenden også når det gjeld norske filmar på kino. Tidleg på 2000-talet blei det laga fleire romantiske filmar, som «Kvinnen i mitt liv», «Kalde føtter» og «Mars & Venus». Men i det siste har det blitt meir action og eventyr, også i norsk film.
Romantisk tørke
Denne helga var «Birkebeinerne» den norske filmen flest kjøpte billett til. Og dei siste åra er det filmar som «Bølgen», «Børning» og «Kon-Tiki» som har hevda seg på kinotoppen.
Også Norsk Filminstitutt merkar at romantikken er inne i ein tørkeperiode i norsk film. Filmkonsulent Silje Riise Næss seier det er langt mellom dei romantiske filmane i søknadsbunken ho har på bordet:
– Tendensen er at det lite av det. Og mindre no enn på den tida folk gjekk på kino for å sjå filmar som «Buddy» og «Detektor», og for ikkje å gløyme «Kvinnen i mitt liv».
Ho synest det er trist at det er så få filmar i denne sjangeren på kino no. Men ho trur det til dels skuldast dei prioriteringane amerikansk filmindustri har gjort.
– Hollywood har hatt eit anna fokus dei siste åra. Dei har satsa på seriar og superheltar. Dei konsentrerer seg om mannsdominerte miljø som har fortrengt parfilmane.