I «Mesternes mester» møtest ti tidlegare idrettsstjerner kvarandre i solfylte omgjevnader for å konkurrere, mimre tilbake på idrettskarrierar og utveksle erfaringar. Programserien blei umiddelbart ein populær serie då første sesong gjekk i 2009.
Men denne sjuande sesongen har vore den mest populære sidan starten. I år gjekk stod kampen i finalen mellom Thor Hushovd og Andreas Håtveit, der syklisten gjekk sigrande ut av duellen.
– Sosialt
Hushovd sa etter sigeren at det sosiale rundt tv-innspelinga er noko av det som han kjem til å hugse lengst:
– Det hyggelegaste var då vi sat rundt middagsbordet, då kamera var skrudd av og crewet hadde gått heim. Då sat vi og prata, lo og tulla, og hadde fornuftige samtalar med mange flotte folk.
Med nesten 1,4 millionar sjåarar blei programmet det mest sette laurdag kveld. Nesten 70 prosent av dei som såg på tv i dette tidsrommet, valde NRK1. I tillegg er det altså også den mest sette episoden i serien nokon gong.
NRK hadde elles ei bra tv-helg med program som finalen i realityserien «Anno», «Nytt på nytt» og skiskytar-VM som alle hadde rundt ein million sjåarar kvar.