Protesterer mot Abba-planar i London

I Stockholm har restauranten «Mamma Mia! The Party» blitt ein suksess etter opninga i fjor. Restauranten er inspirert av Abba-musikalen «Mamma Mia», og er innreia som ein gresk taverna, der publikum får servert middag av syngande servitørar.

No ønsker selskapet til Björn Ulvaeus å ta suksessen til London, men det har fått naboane til å protestere, skriv avisa The Guardian.

Fryktar Abba-fyll

Lokalet som dei har sett seg ut, ligg i bydelen Waterloo, ikkje så langt frå jernbanestasjonen Waterloo Station. Det er allereie fleire teater, museum og i området, og Ulvaeus har sagt at dette er den perfekte plasseringa for restauranten. Men på husveggane heng det plakatar som åtvarar mot planane, skriv avisa:

– Fem hundre fulle ranglefantar kjem til å grise til denne gata medan dei syng «Dancing Queen».

Området har også mange leilegheiter med svært låge månadsleiger, til London å vere. Dei fastbuande fryktar at etableringa av Abba-restauranten skal føre til bråk, og at området skal bli meir kommersielt og føre til at området endrar karakter.

– Dei fleste her har ingenting mot Abba. Vi høyrer til generasjonen som vaks opp med Björn og jentene. Problemet er at det blir for mykje bråk, seier Ken Smith som kan bli næraste nabo til restauranten til The Guardian.

Set i verk tiltak

Til no har over 750 bebuarar skrive under på ei protestliste mot planane. Selskapet som står bak den planlagde restauranten seier dei ikkje ønsker å bli dregne inn i ein debatt om bustadpolitikk i London, men Ingrid Sutej seier til The Guardian at dei vil gjere tilpassingar som gjer at naboane ikkje skal oppleve bråk.

– Vi gjer alt vi kan for å vere så imøtekomande og hyggelege som mogleg.

• Les: Mamma Mia – here we go again
• Les: Benny Andersson om «Mamma Mia 2»: – Syntes først at det ikke var en god idé

Ho lovar blant anna betre lydisolering av lokalet. I tillegg vil dei avslutte showet ein time tidlegare enn først planlagt. Dei har også engasjert publikumssjefen frå London-OL i 2012 for å ta seg av publikum på veg ut av restauranten.