– Eg er veldig stolt og glad på romanen sine vegner, seier Weidner-Olsen til NRK.
Onsdag fortalde NRK at Per Marius Weidner-Olsen via advokaten sin varsla mogeleg erstatningskrav mot Forlaget Oktober.
– Han går utvilsamt glipp av ein heil del royalty-inntekter no ettersom forlaget ikkje har trykt fleire eksemplar av boka, sa advokat Hans Marius Graasvold om saka.
- Les også:
No kan forfattaren vinna Brageprisen.
– Ei trist og einsam kjensle
Etter einigheit med Forlaget Oktober onsdag, har Weidner-Olsen no overtatt rettane til boka si.
– Frå i går av står eg og romanen utan eit forlag. Det gir ei trist og einsam kjensle, seier Weidner-Olsen.
Han viser til at Oktober ikkje har trykka vidare opplag av boka, og synest det er synd at ho ikkje er tilgjengeleg for eventuelle nye lesarar.
– Eg vil tru konflikten rundt boka og Brageprisnominasjonen aukar ei allereie sterk kjøpslyst, seier han.
Leiar for Bragerådet, Kari Marstein seier til NRK at forlaget Oktober ikkje trekte tilbake Brageprisnominasjonen av Weidner-Olsen si bok etter at konflikten blei gjort kjent.
– Juryen har tatt omsyn til den formelle oppmeldinga til Oktober forlag, og deretter gjort deira vurderingar ut frå dei påmelde, seier Marstein.
Forlaget Oktober stadfestar at dei ikkje lengre er forleggar for forfattaren.
– Dette er sjølvsagt veldig gledeleg for forfattaren. Me gratulerer. Weidner-Olsen forvaltar no rettane sine sjølv, og me er ikkje lengre forleggar for boka, skriv forlagssjef Ingeri Engelstad i ein e-post til NRK.