Han blir rekna som ein av dei største låtskrivarane i rock- og pophistoria. Men då Paul McCartney skulle feste med blant andre Beck og Foo Fighters-trommis Taylor Hawkins, blei det bråstopp, melder kjendisnettstaden TMZ.
Dørvakta nektar Paul McCartney å kome inn på etterfesten to gongar. Verten er rapparen Tyga, kjærasten til Kylie Jenner i Kardashian/Jenner-klanen. Det heile er filma og lagt ut på nettstaden. Der kan vi høyre McCartney seie:
– Kor VIP er det mogleg å bli? Vi treng ein ny hit!
Paul McCartney prøver fleire gongar å overtale dørvakta, men utan å lukkast. Etter det andre forsøket gir dei opp, og reiser vidare til ein annan fest.
Lang karriere
Paul McCartney har i løpet av seks tiår levert hits både i grupper som The Beatles og Wings og som soloartist. I tillegg har han samarbeidd med andre artistar og skrive orkestermusikk og ballettmusikk. I samband med valentinerdagen skreiv han også musikk til emojiar på oppdrag for Skype.
Men det er ikkje første gong folk tilsynelatande ikkje veit kven McCartney er. Då han samarbeidde med rapparen Kanye West i 2014, var det fleire som på Twitter skreiv at dei ikkje ante kven denne McCartney var, men at han verka talentfull.