Personar utkledd som Ole Brumm, Tigergutt, Mikke og Minnie Mus opptredde under ein konsert for Kim Jong-un fredag førre veke.
Bileta frå nordkoreansk statsfjernsyn viser Kim Jong-un som smiler og applauderer etter førestillinga i Pyongyang.
Sjå video lenger nede i saka.
NRK.no har fått Nord-Korea-ekspert Geir Helgesen til å sjå på bileta, som han karakteriserer som små, men viktige steg for landet.
– Dette viser at det er forskjell på Kim Jong-un og faren hans. Kim Jong-un er ung og har ei tilknytning til Europa etter studieopphaldet i Sveits, seier Helgesen, som er direktør ved Nordisk Institutt for Asienstudier i København.
Har fått signaturlåt
Kim Jong-un tok over som leiar i Nord-Korea då far hans, Kim Jung-il, døydde i desember i fjor. Det har herska stor spenning om den unge leiaren vil opna opp landet.
Førre veke kom den første offisielle propagandahymna for leiaren.
Les meir: Kim Jong-un har fått seg signaturlåt.
Geir Helgesen har besøkt Nord-Korea fleire gongar, og meiner landet har endra seg dei siste åra.
– Folk på gata har ulike hårfrisyrar og ulike klesplagg. Folk er ikkje lenger så uniformerte. Dessutan har staten gradvis opna opp for meir private aktørar i marknaden. Noko er på gang i Nord-Korea, seier Helgesen.
Han får støtte av kunstnar Morten Traavik, som har arbeidd med fleire kunstprosjekt i Nord-Korea.
– Eg ser små betydelige teikn når eg besøker landet; fleire mobiltelefonar, fleire bilar i gatene og fleire ungdommar på rollerblades.
Les meir:
Sjå video:
Kritiserer norske politikarar
Morten Traavik åtvarar verdssamfunnet mot å legga for mykje i bileta av dansande Disney-figuarar i Pyongyang.
– Det treng ikkje bety noko anna enn at Kim Jong-un likar Mikke Mus. At dette blir ei verdsnyheit må bygga på ei misforståing om at Nord-Korea er i krig mot Mikke Mus. Det er dei ikkje, dei er i krig mot USA, og dei klarar fint å skjelna mellom politikk og populærkultur, seier Traavik.
Både Morten Traavik og Geir Helgesen meiner Nord-Korea er langt opnare for kontakt enn det vestlege styresmakter trur. Dei oppmodar norske politikarar å strekka ut ei hand mot diktatorstaten.
– Norske politikarar er passive og defensive til Nord-Korea, meiner Traavik.
– Nordkoreanske styresmakter veit at systemet deira har spela fallitt, og at dei må finna ein ny veg. Nordiske land kan vera eit førebilete, me klarar å blanda privat og offentlig på ein god måte, seier Helgesen.
Nord-Korea hatt lenge hatt problem med matmangel, og UNICEF åtvarar no mot at mange nordkoreanarar blir kortvokste grunna lite mat.
I fjor kom Amnesty-rapporten som viser at 200 000 nordkoreanarar sit i redselsfulle arbeidsleirar.
– Folk sit framleis i arbeidsleirar fordi dei er sett på som opposisjonelle. Men det kan ikkje hindra oss i å ha ein kritisk dialog med landet, seier Geir Helgesen.