OnklP rørt av sin eigen låt

Det er i det nye programmet «De Neste», at den kjende rapparen OnklP får høyra den sørsamiske artisten Marja Mortensson tolke låten han sjølv har skrive. Før framføringa var han svært spent:

– Ho har ein veldig, veldig spesiell og særeigen måte å gjera det på med joik og sørsamisk. Så kva ho enn finn på, veit eg det blir eksepsjonelt og annleis frå alt eg har høyrt før. Det blir rått, seier Tøien.

I det kommande NRK-programmet «De Neste» får nye artistar tolka songane til nokre av Noregs mest etablerte artistar.

OnklP, også kjend som Pål Tøien, ville oppmoda folk til å snakka om det dei ber på, då han gav ut låten «Styggen på ryggen». I 2014 tok han Noreg med storm med låten.

Han er ein av artistane som er med i eit heilt nytt underhaldningskonsept.

«De Neste»

Søndag 7. mars er det premiere på det splitter nye underhaldningsprogrammet «De Neste» på NRK 1. Det blir publisert i NRK TV 5. mars.

Seks etablerte artistar skal få nokon av dei største låtane sine tolka av seks nye, lovande artistar, altså «De Neste». Samstundes skal dei kjende artistane gi rettleiing, forklara bakgrunnen for låtane og kva desse har betydd for dei.

OnklP er svært nøgd med å vera med som ein av dei etablerte artistane.

– Det er ganske digg å vera artist i dette programmet. Eg berre sit der i ein deilig stol og opplever masse feite framføringar.

Sørsamisk vri på kjend raplåt

Sørsamiske Marja Mortensson er ein av dei unge, lovande artistane som deltek i programmet. Ho kjem frå reinbeitedistriktet Svahken sijte i Engerdal kommune i Innlandet.

– Eg håpar å setja det sørsamiske språket og joiken på kartet. Dei færraste veit at det sørsamiske området byrjar i Hedmark, eller Innlandet som det no har blitt, seier ho.

Ho fortel at ho blandar både norsk, sørsamisk og engelsk i tolkingane sine av hitlåtane.

Også den populære og kritikarroste låten «Styggen på ryggen» frå 2014 får ei sørsamisk tolking når ho står på scena.

– Det er ein legende av ein låt, så sjølv eg som ikkje har høyrt så mykje på rap har eg høyrt denne låten. Og så jobbar eg mykje med tubaist Daniel Herskedal for tida, så me har laga eit univers ut av mange, mange lag med tuba. Det blir ei spesiell sak, men ein utruleg artig låt å framføra.

• Les også:
  • Marjas verk om farmor kan bli internasjonal suksess
  • Agnete Saba: – Håper min historie kan være til hjelp for andre
  • Maria Mena vil lære seg «My lullaby» på samisk

Musikk og glede

– Konseptet er at me skal få høyra nokre norske hits i nye, unge talent si tolking. Det er musikarar som møter musikarar. Det blir masse musikk og glede, seier programleiar Ida Maria Sivertsen.

Programmet som skal visast over seks veker, blei spelt inn i januar. Sivertsen, som til vanleg er artist sjølv, fortel at ho har blitt rørt fleire gonger under innspelinga.

– Det er berre heilt fantastisk å høyra det som rører seg blant ungdommen, og også høyra låtar som me alle har eit forhold til i ein oppdatert versjon med nye kreative variasjonar.

– Målet er at unge, nye artistar får visa seg fram.

Her er dei etablerte artistane som er med i programmet:

• Sondre Lerche
• Lene Marlin
• OnklP
• Cato Sundberg frå Donkeyboy
• Ingebjørg Bratland
• Magnus Grønneberg frå CC Cowboys

Dette er «De Neste»:

• Hedda Mae
• dePresno
• Sebastian Zalo
• Marja Mortensson
• Endre Norvik
• Ylva