Norske dramaseriar danka ut internasjonale søkarar

Dramaserien «Wisting», basert på krimserien til Jørn Lier Horst får 26 millionar i støtte, og dramaserien «Beforeigners» får 4 millionar i tilskot.

Norsk filminstitutt deler ut til saman 57.4 millionar kroner i insentivtilskot. Tre norske dramaseriar stakk av med heile potten.

I helga skreiv NRK at Kronprinsesse Märtha sin innsats under 2. verdskrig blir NRK-drama.

Det er tredje året at NFI deler ut pengar til store internasjonale film- og dramaproduksjonar gjennom insentivordninga. Pengane dei får tildelt skal dekke inntil 25 prosent av den pengesummen som produksjonen planlegg å legge igjen i Norge.

Tidlegare har store Hollywood-produksjonar som «Snømannen» med skodespelar Michael Fassbender, «Mission Impossible 6», med Tom Cruise og «Downsizing» med Matt Damon fått pengar frå NFI. Men i år har filminstituttet valt å satse berre på norske dramaseriar.

LES OGSÅ: Preikestolen med i «Mission Impossible»-trailer

LES OGSÅ: «Snømannen» får blandet mottagelse i Sverige

Avdelingsdirektør i NFI, Stine Helgeland seier dei tildeler pengar til dei prosjekta som har størst ambisjonar, høgast budsjett, stor grad av internasjonal finansiering og bred internasjonal distribusjon.

– Basert på desse faktorane var det dei tre norske dramaseriane som gjekk til topps i denne runden, seier Stine Helgeland.

Desse tre dramaseriane har budsjett på til saman 400 millionar kroner.

11 søkarar, men ingen frå Hollywood

Innan fristen 10. januar var det 11 som hadde søkt om støtte gjennom insentivordninga. Av desse var det seks dramaseriar og fem utanlandske spelefilmar. Ingen av dei var frå Hollywood.

Av dei utanlandske produksjonane som søkte var det altså ingen som nådde opp.

– Målet med insentivordninga var å trekke internasjonale produksjonar til Norge, oppfyller de krava når de berre gjer pengar til norske produksjonar?

– Formålet er at store internasjonale produksjonar skal komme til Norge å nytte norske filmarbeidarar og norsk kompetanse.

– I internasjonale produksjonar inngår også norske produksjonar, og nå er norske dramaseriar på eit så høgt internasjonalt nivå at det var dei sterkaste søknadane i søknadsbunka denne gong, seier Helgeland i NFI.

Norsk produksjonsselskap tilbode 53,3 millionar

Cinenord står bak både «Alt for Norge» og «Wisting», som er tildelt til saman 53,3 millionar kroner frå insentivordninga.

Produsent Silje Hopland Eik er involvert i begge produksjonane som produsent i «Alt for Norge» og regissør i «Wisting». Tidlegare har ho vore kritisk til insentivordninga fordi ho meiner den ikkje gagnar norsk filmbransje, ifølge Klassekampen.

Nå har begge prosjekta ho er involvert i fått millionstøtte gjennom ordninga.

– Det er utruleg gledeleg å ha mottatt dette tilskotet til eit prosjekt som er så viktig for vår historie, seier Silje Hopland Eik.