For to år sidan fekk fiskaren frå tettstaden Søgne utanfor Kristiansand ein idé om å dele livet på sjøen.
– Eg vil formidle fiskaryrket til dei unge spesielt at det faktisk er ein jobb, og at ein kan ha det gøy med det, fortel han til Lindmo der han er gjest i kveld.
– For meg er dette draumejobben, dette er hobbyen min. Sjølv om yrket også inneber mykje hard jobbing, fortset han.
TikTok-suksessen starta med at han delte ein video av ein coladrikkande fisk. Den gjekk raskt viralt.
Humor, men blodig alvor
Etter kvart byrja han å filme seg sjølv i utfordrande vêr og forhold. Det viste seg å falle i smak hjå TikTok-publikummet.
– Eg la fort merke til at folk likte videoane som viste kor høge bølgjene på havet var, og korleis ein blir slengt rundt på båten når kreftene tar tak, seier han.
Med det får han vist både humoren og det blodige alvoret i det å vere fiskar.
– Det er mykje som kan gå gale på ein fiskebåt, legg han til.
82 millionar visningar
På to år har han opparbeida seg 4 millionar følgjarar, og er dermed ein av Noregs største TikTokarar. Den mest populære videoen har over 82 millionar visningar.
Det er 16 gangar Noregs befolkning.
– Det er jo ganske vilt at 82 millionar har sett vesle meg på sjøen. Eg har eigentleg ikkje ord på kva eg føler om det, seier han.
– Kvifor har du blitt så populær, trur du?
– Det er fordi eg deler ei side av fisking som mange ikkje har sett før. Eg viser livet inne i båten, fiskane eg får og generelt livet på sjøen.
Fans frå USA og avtale med Netflix
26-åringen har følgjarar frå heile verda, der mesteparten er frå USA.
– Det var dit TikTok sende videoane mine fyrst, og det var der dei fyrst vart populære, forklarar han.
Til og med store stjerner, som den tidlegare basketspelaren Shaquille O´Neal følgjer søgnesokningen.
Han har også vorte kontakta av fleire store aktørar, deriblant Netflix. Strøymeselskapet ville at han skulle lage ein reklamefilm for dei. Noko han sa ja til.
– Det var ein barnefilm om sjømonster eg skulle reklamere for, fortel han.
Bakke legg ikkje skjul på at han tente godt på oppdraget, men han vil ikkje avsløre summen.
– Netflix er store, så eg fekk så eg vart fornøgd.
TikTok-influensaren tener også gode pengar ved å reklamere for ulike klesmerke, produkt eller songar.
– Eg kunne sikkert ha levd av TikTok hadde eg gått inn for det. Men eg lagar ikkje videoar for å tene pengar.
Visuelt og unikt
Geir Christian Johannessen er universitetslektor i kommunikasjon og medium på Universitet i Agder.
Han peiker på fleire moglege grunnar til at Fisherbenny har gjort det så bra på TikTok:
– Det er utruleg visuelt og rikt materiale. Det er unikt. Det er personleg, og det har humor.
Er det noko som kjenneteiknar eit medium som TikTok eller Snapchat så er det at du må ha ein stoppeffekt for at det skal skilje seg ut.
Det har desse videoane, ifølgje Johannessen:
– Du er med ein gong i eit spennande miljø der verda ikkje fungerer heilt som på land.
Vil inspirere
Sjølv om Bakke er interessert i å prøve ut fleire prosjekt innan media, likar han godt kvardagen slik den er er.
– Fisking er hobbyen min, og noko eg aldri kjem til å slutte med.
Han jobbar til vanleg på båten Udvaar 3, der han er to veker på sjøen og to veker heime.
Året rundt.
– Det verste med å vere ute på sjøen er å vere borte frå dei heime, spesielt den to år gamle sonen min, fortel han til Lindmo.
På den andre sida får han vore to veker heime med sonen og sambuaren sin når han mønstrar av.
Han er svært tilfreds med tilværet som fiskar, og håpar videoane hans kan få fleire til å vurdere yrket.
– Eg håpar på å inspirere. Spesielt dei yngre.
Sjå Lindmo her: