NRK Meny
Normal

Nobel-aktuelle Kygo: Torte ikkje spele på skuleavslutning

Artisten Kygo vil bli sett av sjåarar i 100 land under Nobelkonserten fredag. Men han har ikkje alltid likt eit stort publikum. Sjå intervjuet der verdsartisten fortel korfor han aldri torte å spele på skuleavslutninga.

EIN MILLIARD SPELINGAR: Sjå videointervjuet med Kygo her der han fortel om suksessen og det å spele på Nobels fredspriskonsert. Reporter: Christian Ingebrethsen. Foto/redigering: Jorunn Hatling.

Fredag skal artistar frå heile verda hylle fredsprisvinnarane frå Tunisia. Kygo, som eigentleg heiter Kyrre Gørvell-Dahll, får med seg sambygding Kurt Nilsen og skal blant anna framføre den globale hiten «Firestone»:

Prisvinnarane

VINNARANE: Vinnarane av fredsprisen i 2015 er kjent som Den tunisiske dialogkvartetten. Ein arbeidsgjevar-organisasjon, ein arbeidstakarorganisasjon, ein menneskerettsorganisasjon og ei advokatforeining vann prisen for ein fredeleg overgang frå revolusjon til demokrati.

Foto: Larsen, Håkon Mosvold / NTB scanpix

Når det er så mykje uro i verda, er det viktig å ha ei ekstra markering for organisasjonar og menneske som gjer ein ekstra innsats for fred, seier EDM-artisten til NRK. Nobels fredspriskonsert vil bli sendt i over hundre land og sett av fleire hundre millionar.

Store tal og massevis av publikum er noko Kygo har blitt vant til i det siste. Songane til musikaren har blitt spela over ein milliard gonger på Spotify:

– Ein milliard høyrest heilt sinnssjukt og er vanskeleg å ta inn over seg. Det er heilt utruleg å tenkje på at så mange har høyrt på musikken.

(Saka fortset under videoen)

Nobels fredsprisvinnerne møter fakkeltoget

HYLLA VINNARANE: Kygo spela torsdag kveld utanfor Grand Hotell i Oslo då vinnarane blei hylla av fakkeltoget.

– Verdsstjerne som blir kopiert av Justin Bieber

Musikksjef i P3, Mats Borch Bugge, slår fast at Kygo no har blitt ei global stjerne:

– No er han verdsstjerne. Han har på ein måte blitt ambassadør for ein sound som har etablert seg veldig sterkt i Norge og internasjonalt. Han lagar musikk som appellerer til mange og som er lett å høyre på. Musikken blir kalla tropisk house, fortel musikksjefen og legg til:

– Stjerner som Justin Bieber kopierer Kygo og det han gjer no. Det er interessant. Samtidig vil han måtte fornye seg og musikken skal han framleis vere viktig, seier P3-musikksjef Mats Borch Bugge.

Fredag står Kygo på scena i Telenor arena saman med Kurt Nilsen.