Som mange hadde spådd på førehand, presenterte datagiganten ein ny Apple TV på kveldens pressekonferanse.
– TV-opplevinga har omtrent stått stille, medan innovasjonen har vore stor i mobilverda. Det er på tide å gjere noko med det, sa Tim Cook, administrerande direktør i Apple, til eit fullsett auditorium i San Francisco.
Han kunne mellom anna presentere ein ny type «fjernsynskontroll». Ved å snakke til taleprogrammet Siri skal du kunne finne filmen eller serien du søkjer. I staden for å leite gjennom både Itunes, Netflix og HBO, til dømes, gjer Siri eit felles søk i alle app-ane.
Snakkebasert TV
Cirka 17 prosent av befolkninga har allereie ein Apple TV.
– Det er ikkje så mange som har knytta denne type stemmefunksjon til TV før. Sjølv om nokre få har prøvd seg, så er det banebrytande at Apple klarer å gjennomføre det på ein slik måte at det er lettvint for folk flest, seier Ståle Grut, journalist i NRK Beta.
For å spole, til dømes, treng ein berre seie «Kva sa ho/han?» til Siri, som deretter spolar tilbake.
– Forventa litt meir
Ståle Grut lurer på korleis dette skal fungere i praksis.
– Eg hadde kanskje forventa litt meir. Det var mykje snakk om at TV-en skulle bli tettare integrert med heimen. Eg er spent på korleis det blir når fleire ser TV ilag og skal bruke stemmefunksjonen, seier Grut.
LES OGSÅ:
I kor stor grad vil dette endre TV-tittinga vår?
– Innhaldet er framleis det same, så eg er usikker på om det vil endre måten vi ser på TV på. Men det vil dytte industrien inn i denne type navigering, med stemmestyring, seier Grut.
LES OGSÅ: NRKBeta: «Det vi er mest gira på under Apple-lanseringen»
Speling tar over for TV-en?
Apple byrjar også med spel, og folk kan koble seg på om dei har ein Iphone eller Ipad.
– Dette kan gjere at speling blir eit alternativ til å sjå TV saman. Wii har tidlegare prøvd på dette, men det er nok fleire som har Iphone. Dei kan nå ein breiare marknad når det gjeld det å spele spel i stova, seier Grut.
Cook framheva også app-butikken som skal følgje med TV-en.
– Framtida til TV-en er app-ar, sa han.
Produkta vil først bli sleppt i ei rekkje land i slutten av oktober. Det er uvisst om Noreg er blant desse.