Moteekspertane gir deg vårmoten

Designarane viste eit hav av stilar på catwalken då vår- og sommarmoten vart presentert i fjor. No er kleda i butikkane og trendane på gatene. Men korleis overføre ekstravagante designantrekk til kvardagslivet?

Vi guidar deg til tre av trendane som dominerer motebiletet akkurat no.

Knallfarge-prosjektor

– Vi hadde det gøy, og var veldig nøgde med å sjå på friske fargar, lette tekstilar og lange, bølgjande kjolar. Kva som var vår favorittfarge? Shiny! uttalte Marc Jacobs til Style.com då han hadde vist sine visjonar for våren og sommaren 2011.

Nedover catwalken spankulerte modellar i lilla, rosa, burgunder, raudt og blått. Fleire designarar tenkte i same bane og viste sterke fargar som rosa, grønt, oransje, raudt og gult i sine kolleksjonar:

• Jil Sander gjorde det som tidlegare vart sett på som ei forbryting i moteverda: Han miksa raudt og rosa i same antrekk.
• Max Mara gav oss komplette antrekk i éin farge, i minimalistisk stil med reine snitt.
• Medan Gucci tok i bruk ein stor, delikat fargepalett som gjekk frå lilla, oransje og grønt til beige.

Sjå vårvisninga til Jil Sander og la deg inspirere:

– Det er veldig kult å mikse knallfargar, men det er ikkje alle som tør det. Då kan ein bruke eitt knallfarga plagg med svarte eller kvite jeans til, for eksempel. Det finst også mykje tilbehør i sterke fargar, og knallfarga jeans kan vere eit alternativ for dei som ikkje vil kle seg i ein farge frå topp til tå, seier moteredaktør i Elle, Petra Middelthon.

Også Sissel Hoffengh, journalisten bak spalten «Ille til mote» i Dagsavisen, har tru på knallfargane.

– Sjokkrosa blir kjempestort! Men du treng ikkje kome i sjokkrosa dress på jobb. Du kan plukke tilbehør i knallfargar, for eksempel. Så må du også sjå på kva du toler av fargar, ver forsiktig med å bruke grønt og rosa opp mot ansiktet, rådar ho.

Om du dukkar opp i knallfargar må du vere budd på merksemd.

– Eventuelt kan du lakke neglene i knallfargar mot eit elles nøytralt antrekk, eller gå for ein knallraud leppestift mot eit svart antrekk, seier Hoffengh.

That 70s Show

Jodie Foster i «Taxidriver» er referanse for mange av designarane denne sesongen. Men dei tolkar det populære tiåret på ulike måtar.

• Roberto Cavalli viste ein prærie-hippie med frynsar og klede i jordtonar.
• Pucci, med norske Peter Dundas i sjefsstolen, viste ein delikat 70-talsstil med fargar, inspirert av italienske jet-settarar.
• Marc Jacobs har fått disco-feber, og var inspirert av Bianca Jagger, difor dei skinnande fargane.

– For å få litt 70-talskjensle kan du for eksempel kjøpe deg ei slengbukse, det har alle kjedebutikkane. Gå også for blomstermønster og frynsedetaljar, rådar Petra Middelthon.

Ho ser mellom anna på Roberto Cavalli som ein god, moderne innfallsvinkel til tiåret.

Sjå innslag frå Style.com om korleis Marc Jacobs tolka 70-talet:

Sissel Hoffengh framhevar det store spennet i moten frå 70-talet.

– Det har etterslep av 60-talshippiane, men også discobølgja, punken, samt den fantastiske motsetnaden glamrocken. Alle desse stilane er det lett å plukke frå, seier ho.

Men igjen kan det vere lurt å moderere seg.

– Om du går for ein retrostil må du passe på at det ikkje ser ut som eit kostyme. Alt med måte, du kan plukke ei veske med frynser, ei slengbukse, eller plagg med grafiske Marimekko-mønster. Det er ein nydeleg periode å plukke frå, du treng ikkje å køyre stilen frå topp til tå, seier Hoffengh.

(Artikkelen held fram under biletet)

Perfeksjonistisk minimalist

I vår og sommar finst det også klede for deg som likar det heilt enkelt. Det er framleis perfeksjonistiske minimalistar blant designarane, der snittet og den perfekte silhuetten er viktigast.

• Calvin Klein var ein av pionerane for denne stilen på 80- og 90-talet, og satsar på reine linjer, kvitt og svart, i vår og sommar.
• Chloé viste gjennomførte, enkle antrekk i nøytrale fargar som beige.
• Medan Céline miksa skinn og tresko med enkle toppar i beige og kvitt.

Her må du rekne med å gå litt opp i pris for å lukkast med stilen.

– Gå for dyre, fine stoff og klassiske snitt. Du lukkast ikkje med denne stilen med billige, kjipe stoff. Rein, fin bomull og kasjmir er gode tips, så du må nok litt meir opp i prisklasse, seier Petra Middelthon, moteredaktør i Elle.

Vil du liggje i forkant av trendane? Les meir om moten som kjem til hausten og vinteren her:

• Kate Moss tilbake på catwalken
• Multimedial moteveke i London
• Internasjonalt moteblikk på Skandinavia