Italienske arkeologar opna i dag eit nytt gravkammer ved eit kloster i Firenze. Dei er på jakt etter skjelettet til Lisa Gherardini, som skal ha stått modell for det verdskjende maleriet Mona Lisa.
I dag blir fleire bilete frå utgravinga offentleggjort. Bileta viser det som kan vera leivningane etter kvinna som stod modell for maleriet.
Lisa Gherardini var gift med ein velståande handelsmann, og flytta til klosteret Sankt Ursula i Firenze etter at ektemannen døydde. Ho skal ha blitt gravlagt ved klosteret i 1542.
Leita i 25 år
Kvinna med det mystiske smilet har inspirert og besett mange.
Historikaren Giuseppe Pallanti har brukt 25 år på å bevisa at Leonardo da Vinci sin far var nabo til Lisa Gherardini, skriv Huffington Post.
Ekspertar er no sikre på at Lisa Gherardini stod modell for Mona Lisa. Beviset finn dei i nokre skriblerier ein ven av Leonardo da Vinci gjorde i margen på ei bok frå 1503. Venen skriv at da Vinci held på med eit portrett av Gherardini.
Vil ha fred
Etterkommarar av Lisa Gherardini er kritiske til jakta på Mona Lisa-modellen. Dei meiner etterlevningane må få kvila i fred, og at utgravinga av skjeletta er krenkande, skriv The Telegraph.
Slike omsyn tek ikkje arkeologane, som har arbeidd med utgravingane sidan mai i fjor. Skjeletta dei finn, kjem til å bli undersøkt ved Universitetet i Bologna.