Ekspertutval: – Anbefaler statsstøtte til kommersiell allmennkringkasting

Klokka 11.00 tysdag leverte utvalsleiar Knut Olav Åmås ein delrapport til kulturministeren.

– Utvalet si vurdering er at det kan vere behov for offentleg støtte til kommersielle allmennkringkastarar i Norge, viss staten ønsker å redusere risikoen for eit dårlegare tilbod i Norge dei næraste åra, sa Knut Olav Åmås då han la fram rapporten.

Les også: NHH-rapport: Kritisk til å gi TV 2 statsstøtte

I fjor haust sette regjeringa ned eit såkalla mediummangfaldsutval.

Ein mediebransje i rask endring gjorde at utvalet fekk i oppdrag å sjå på kva slags økonomiske modellar staten bør bidra med for å sikre eit mediemangfald i Norge.

Då Tv 2 sa nei til ein midlertidig konsesjon med staten i august blei innleveringsfristen for ei delutgreiing frå utvalet om kommersiell allmennkringkasting påskunda.

– Bør stille krav til innhald

Utvalet meiner at krav om ein bestemt type innhald bør vere premisset og forutsetninga for statsstøtte til ein kommersiell allmennkringkastar.

– Eit minimum er at det blir stilt krav om ei brei nyheitsdekning. Kringkastaren bør tilby norske debattprogram, norske dokumentarar og daglege nyheitssendingar, seier Åmås.

Opnar for lokalisering utanfor Bergen

I dag har Tv 2 sitt hovedkontor i Bergen, men utvalet meiner at lokalisering av ein kommersiell allmennkringkaster utanfor Bergen kan bidra til mediummangfaldet og tilby eit alternativ til Oslo-dominansen.

– Eit krav om lokalisering i Bergen vil i høg grad avgrense søkargrunnlaget, sidan det er betydelege etableringshinder for aktørar utan tungt nærvær i regionen.

Tv 2 fornøgde med rapport

– Tv 2 er glad for at eit samla mediummangfaldsutval deler stortingsfleirtalet sitt syn på at kommersiell allmennkringkasting, med hovudkontor ein anna stad enn Oslo, er eit viktig bidrag til norsk mediemangfald, det seier Tv 2-sjef Olav T. Sandnes.

Olav T. Sandnes er sjølv blant dei ti personane i mediummangfaldsutvalet som har utgreia rapporten.

- Nå håpar vi delutgreiinga frå utvalet kan bidra til at stortingsmeldinga som kulturministeren skal legge fram før nyttår vil kunne fungere som eit grunnlag for ei avtaleutlysning. Det er avgjerande med ei rask avklaring for at Tv 2 skal kunne søke, seier Sandnes.