Mangeårig NRK-journalist Brita Blomquist er død

Mange hugsar den tidlegare programleiaren og journalisten frå gamle NRK P2 på åttitalet og seinare også reiseprogrammet «God tur».

Ho var opphavleg frå Oslo, men har sidan 1994 budd i Ålesund.

I tillegg til NRK har ho jobba i vekebladet Nå og Aftenposten.

– Energisk menneske

Den tidlegare NRK-profilen Vidar Lønn-Arnesen jobba til tider tett med Blomquist, og fortel om svært gode minner.

– Eg hugsar Brita som eit energisk menneske som hadde mange idear, noko som er veldig viktig i bransjen vår.

Lønn-Arnesen seier at ho hadde veldig lett for å komma i kontakt med andre og hugsar spesielt godt då dei skulle ha direktesending frå Aker Brygge.

– Me skulle føla litt på pulsen blant livet og båtane. Ho var stappfull av gode idear. Ho ville vera utereporter ute blant folk, og ikkje sitta inne i studio. Når Brita var i aksjon blei det levande.

Reiseentusiast og takksam for små gleder

Blomquist var glad i å dela gode opplevingar. Etter at ho pensjonerte seg heldt ho seg travel med firmaet «Britas god tur». Her tok ho med seg reisande på spennande turar mellom anna i Sør-Europa.

– Eg er kanskje verdas eldste turoperatør, sa ho til NRK i 2016.

Ho fortalde også at ho var opptatt av å vera i stand til å sjå godheit og glede i dei små kvardagslege hendingane, og vera takksam for desse.

I dødsannonsen skriv dei pårørande at minnestunda berre er for dei næraste på grunn av korona.