NRK Meny
Normal

Lyrån før EDM i Stjernekamp – Frykta mamma på russebussrulling

Laurdag blir det trommemaskiner og syntheziserar når artistane i Stjernekamp skal gi seg i kast med elektronisk dansemusikk, EDM. Det er ein ukjent sjanger for fleire av deltakarane.

Stjernekamp

Alle artistane i Stjernekamp gjekk vidare etter første sending. Laurdag blir stemmene som kom inn sist lagt saman med stemmene som kjem inn under EDM-sendinga.

Foto: Julia Marie Naglestad / NRK

Med artistar som Kygo, Alan Walker og Cashmere Cat har Norge blitt sett på EDM-kartet. Denne musikksjangeren har dominert internasjonale hitlister dei siste åra, og er det vi kan kalle popmusikk av i dag.

Etter at alle kom seg meir eller mindre velberga gjennom stadionrock i sesongpremieren, skal artistane i Stjernekamp skape fest- og klubbstemning på NRK1 laurdag kveld.

– Mamma på russebuss

Hilde Lyrån i Stjernekamp 20127

EDM er ein ny sjanger for Hilde Lyrån. Den siste veka har ho brukt tida på å lære seg tekst og finne rett stil.

Foto: Julia Marie Nagelstad / NRK

For fleire av artistane blir dette ein ny og ukjent sjanger med eit ungt og særprega uttrykk.

– Eg var redd det skulle sjå ut som om mamma var ute og rulla med russebussen. Men eg har pugga tekst og prøvd å finne stilen, seier Hilde Lyrån, som var ein av dei som fekk færrast stemmer i første program.

Men det har ho prøvd å ikkje tenke for mykje på. I staden har ho fokusert på å brette opp ermane og jobbe på. Og ho har trua på at «All Night» med Icona Pop skal ta henne vidare:

– Det er ei skikkeleg gladlåt som folk kan synge med på. Eg høyrde gjennom mykje EDM-musikk for å velje rett låt, og likte denne godt.

Ho får også med seg eit barnekor med 40 barn på scenen, som ho trur kan skape ekstra gladstemning.

Hilde Lyrån prøver Stjernekamp program 2

40 barn frå Art Musikal- og ballettskole på Røa i Oslo og Showskolen i Hønefoss blir med Hilde Lyrån på scenen laurdag kveld. Dette er frå prøvene tidlegare i veka.

Foto: Helene Amlie / NRK

– Stor fallhøgde

Sjølv om han ikkje har sunge EDM sjølv, har Gaute Ormåsen eit ganske nært forhold til sjangeren. Han høyrer mykje på den type musikk, men han seier han er spent på å skulle synge live:

– Når folk høyrer på EDM, høyrer dei på musikk som er gjennomprodusert. Det er difor stor fallhøgde å skulle framføre slike songar live på TV.

Han var også blant dei som fekk færrast stemmer etter første program, og som difor kanskje må overtyde litt ekstra i EDM.

– Eg har blitt litt meir nervøs. Mange trur kanskje eg er roleg på slike ting, sidan eg var med i Idol i 2003. Men eg er ikkje ung og lovande lenger, og eg treng dei stemmene eg kan få. Så eg håper folk vaknar litt.

GAute Ormåsen i Stjernekamp 2017

Gaute Ormåsen er litt nervøs etter at han blei ein av dei som fekk færrast stemmer i første program av Stjernekamp. No håper han å overtyde i EDM.

Foto: Julie Marie Nagelstad / NRK

Dette er songane som skal framførast i kveld:

  • Makeda: «How Deep Is Your Love» (Calvin Harris & Disciples)
  • Erlend Bratland: «Dancing On My Own» (Robyn)
  • Aleksander Walmann: «Scared To be Lonely» (Martin Garrix & Dua Lipa)
  • Benedicte Adrian: «Running To The Sea» (Röyksopp feat. Susanne Sundfør)
  • Gaute Ormåsen: «Lay It On Me» (Ina Wroldsen & Broiler)
  • Hilde Lyrån: «All Night» (Icona Pop)
  • Didrik Solli-Tangen: «Breathe» (Seeb feat. Neev)
  • Ida Maria: «With Every Heartbeat» (Kleerup feat. Robyn)
  • Adam Douglas: «False Alarm» (Matoma & Becky Hill)
  • Lisa Børud: «Bang My Head» (David Guetta feat. Sia & Fetty Wap)