Vasily Petrenko vart Liverpool-filharmoniens yngste sjefdirigent gjennom tidene då han tok over i 2006. Orkesteret har fått eit stort løft med han ved roret, og Petrenkos innsats har blitt lagt merke til.
Les Ragnhild Veires kommentar:
Fleire orkester skal ha vore på jakt etter den unge russaren, men Oslo-filharmonien har vore i samtalar med Petrenko sidan han dirigerte orkesteret i desember 2009.
Sjå Vasily Petrenko fortelje om sitt første møte med Oslo-filharmonien:
Ingen diktator
Petrenko har fått si opplæring ved St. Peterburgs beste eliteskular, og ber på ein stolt arv frå den russiske dirigenttradisjonen. Sjølv er han oppteken av at dirigenten må jobbe på lag med orkesteret:
– Eg meiner at tida for diktatoriske dirigentar er forbi, seier Vasily Petrenko.
– Mellom dei store dirigentane finst det berre to slike igjen, Riccardo Muti og Valery Gergiev. Mitt credo er «vi er musikarar», både eg og orkesteret, og vi skaper musikken. Eg prøver å hjelpe orkesteret å gjere deira musikk betre, ikkje vise dei at eg er ein superhelt og dei mine reiskapar.
Sjå Petrenko dirigere og instruere Castilla y Leon-orkesteret i den spanske byen Valladolid:
Ser etter hus i Oslo
Petrenkos engasjement i Liverpool-filharmonien varer til 2015, og det kjem han til å fullføre parallelt med arbeidet i Oslo. Dirigenten har stifta eigen familie og bur i Liverpool, men utelukkar ikkje at han kan kome til å flytte til Oslo:
– Eg har vore i kontakt med eigedomsmeklarar og ser etter hus, men eg må sjå det an, seier 34-åringen.
– Som familiemann og dirigent ville nok det ideelle for meg vere å ha to basar der eg kan opphalde meg når som helst. Eg er veldig lei av å bu på hotellrom.