Hamida Maryam Kristoffersen frå Bjarkøy i Troms kan stå over for eit gjennombrot denne sommaren: I byrjinga av juli tek ho del i den prestisjetunge Belvedere-konkurransen i Amsterdam, og i august er ho klar for Dronning Sonja-konkurransen i Oslo.
Les:
Høyr: Radioreportasje om Hamida Kristoffersen
– Ho førebur seg 24 timar i døgnet
Sjølv med store konkurransar i kikkerten tek Hamida slett ikkje lett på masterkonserten sin ved konservatoriet i Tromsø. Når eg møter henne nokre timer i forkant er ho ein smule stressa, om ikkje over sjølve songen:
– Vi har prøvd å få til scenen frå Verdis «Otello» med rekvisittar, så det har blitt litt stress for å flytte og få på plass ei gammal seng, gamle teppe, bord og stearinlys, fortel Hamida Kristoffersen.
– Ho førebur seg 24 timar i døgnet på det ho skal gjere, fortel Anne-Lise Sollied Allemano, som er songlæraren hennar i Tromsø.
– Ho er i musikken heile tida og syng verkeleg med hjartet – det kan bli hennar varemerke. Eg trur ho vil etablere seg mellom dei fremste lyriske sopranane i landet.
– Det som skjer på scenen er jo eit enormt drama
Det blir nok av utfordringar før alt står klart på scenen. Men når konserten vel er i gang, ligg stemninga i rommet atskilleg nærare Otellos middelhav og mellomalder – med italienske Carlo Allemano i rolla som Otello.
– Ein kan undre seg over kvifor eg slit og sveittar for å synge eit halvtimes operautdrag på ein konsert som dette, seier Hamida når det heile er over.
– Men eg gjer det ikkje berre for publikum, eg gjer det også for meg sjølv. Med rekvisittar og kostyme blir det ei heilt anna oppleving for meg, enn om eg berre skulle stå rett opp og ned og synge – det som skjer på scenen er jo eit enormt drama!
Carlo Allemano og Hamida Kristoffersen under eksamenskonserten.
Foto: Fred Olav Vatne / NRKSlo gjennom i nord som Mimi
Hamida Kristoffersen har allereie markert seg på operascenen: «Et stjerneskudd landet i Tromsø» var overskrifta då Nordlys melde Nordnorsk Operas framsyning av «La bohème» våren 2012.
«Ei ny stjerne er tent på den norske operahimmelen. Og jeg er sikker på at den vil vandre og lande på en rekke internasjonale operascener rundt om i verden.» skreiv Bjørn H. Larssen i meldinga av premieren i Tromsø.
– Hamida har ein spesielt varm og vakker, lyrisk sopran, seier Katharina Jakhelln Semb, operasjefen ved Nordnorsk Opera.
– Men det som verkeleg får henne til å skilje seg ut, er ei uttrykksfylde som går rett i hjartet på deg.
Sjå og høyr Hamida som Mimi ved Nordnorsk Opera:
– Opera kan få den sterkaste mann til å gråte
Hamida Kristoffersen vaks opp på Bjarkøy utanfor Harstad, med ein handfull elevar i klassen og ifølgje seg sjølv utan påfallande songtalent i barneåra. Det endra seg då ho song Lennons «Happy Xmas» med skulekoret som tolvåring:
– Eg hadde aldri tenkt over at eg var flink til å synge, men etter julekonserten kom folk bort til meg og sa det, så då byrja eg å ta det på alvor.
Det skulle ta ein del år før ho følte seg vel om å synge klassiske songar og opera:
– Det var først då eg på konservatoriet fekk til å synge dei ariane eg sjølv syntest var fine, og som gjerne var triste og lidande, at det føltest riktig for meg. Og det har betydd svært mykje å få jobbe med musikken scenisk, slik at det handlar om ei historie, og ikkje berre om å stå og vise seg fram.
I dag er ho sjølverklært «operageek» og kan bruke timevis på å snakke om musikk og songarar ho likar, om ho finn ein likesinna. Samstundes har ho stor overtyding om operaens evne til å berøre kven som helst:
– Opera gjort på rett måte kan få den sterkaste mann til å gråte. Og det veit eg, for det gjer stefaren min, og han er sterk!
