Kronprinsessa: – Munch og Knausgård lærer oss å sjå ting på nye måtar

Litteratur er ein av dei store lidenskapane til kronprinsesse Mette-Marit. Når Noreg er hovudland under bokmessa i Frankfurt, er det difor naturleg at kronprinsparet er med for å fremje norsk kultur

Som ei oppvarming til bokmessa, opna kronprinsessa torsdag ei Munch-utstilling i Düsseldorf. Utstillinga er den same som Karl Ove Knausgård kuraterte for Munch-museet i 2017.

Kronprinsesse Mette-Marit fortalde NRK under opninga at ho ser klare likskapar mellom måten Munch malar på og korleis Knausgård skriv.

– Dei lærer oss å sjå ting på ein annan måte. Eg kjenner at eg alltid lærer noko nytt både i møte med Munchs bilde og tekstane til Knausgård.

Favoritt

Knausgård er ein forfattar som har betydd mykje for kronprinsessa. Og det er særleg det første bindet av Knausgårds «Min kamp» som har treft kronprinsessa i hjartet.

I forbindelse med oppstarten av litteraturtoget i 2014, fortalde kronprinsessa korleis ho kjente seg igjen i Knausgårds skildringar av ein alkoholisert far i det første bindet av «Min kamp».

– For meg har noko av det vanskelegaste temaet i livet mitt vore forholdet til faren min og forholdet mitt til døden. Den siste setninga av «Min kamp», første bind, siterer eg ofte inne i meg, i periodar dagleg, sa ho.

• Les: Kronprinsessen i ny bok: – Vi trenger ikke være redd for livet
• Les: Tilbake på jobb etter langt sjukefråvær

Det første møtet med tekstane var sterkt, fortalde ho

– Då eg las Karl Ove Knausgård første gong, var det som om noko inni meg gjekk i sund, og det opna seg eit stor hol i brystet mitt.

Meiner kronprinsessa var modig

Karl Ove Knausgård set pris på rosen han får frå kronprinsessa. Han meiner det må ha kosta henne mykje å opne opp om noko så vanskeleg og privat som ho gjorde den gongen.

– Det var modig av henne å seie det ho sa i den posisjonen ho er i. Ho fortalde om veldig vanskelege og private ting. Men det at nokon, uansett kven det er, får den reaksjonen på noko eg har jobba med, er meir enn eg kan håpe på, seier han til NRK.

Men samanlikninga med Munch synest han kanskje blir litt for mykje av det gode.

– Det er ubehageleg og flautt å bli samanlikna med han. Munch er ein av dei verkeleg store kunstnarane. Eg når han knapt til leggen. Men det er hyggeleg at det blir sagt i ein festtale.

No gler han seg til å vere med å vise fram norsk kunst og kultur i Tyskland. Først gjennom Munch-utstillinga i Düsseldorf, før turen går vidare til Frankfurt i neste veke der han skal halde opningstalen.