- No torer eg å køyre bil!

- Eg forstår angsten no, den er blitt ufarleggjort.

- Eg har lært meg å puste med magen! Eg køyrer bil!

10 veker mot panikk

Kommentarane frå testpersonane talar sitt eige språk, deltakarane som gjennomførte 10-vekerskurset har klart å ta tak i problema sine.

Sjølv om dei ikkje blir kurerte for panikklidingane, og sjølv om ei side på ein dataskjerm ikkje kan erstatte det personlege møtet med ein fagperson, meiner testpersonane å ha fått hjelp.

Angst for angsten

- Dei som kjem til oss med panikklidingar forklarar at eit panikkangst-anfall kan komme som lyn frå klar himmel. Det seier stipendiat Tine Nordgreen ved Universitetet i Bergen. Ho tek doktorgraden på sjølvhjelpsprogrammet, som kan bli landsdekkande om effekten viser seg å vere bra.

- Målet er at pasientane skal kjenne igjen sine eigne reaksjonar, forstå kva som skjer og manipulere sine eigne tankar. Slik kan ein unngå å bli redd, ein skjønar at hjertebanken ikkje er eit hjerteinfarkt.

Tusenvis får panikkanfall

To til fire prosent av alle vaksne nordmenn har panikklidelsar, og når anfallet kjem, med pustebesvær, hjertebank og dødsangst hjelper det ofte lite å vite at ein har ein lidelse. Kroppen overstyrer tankane.

- Nokon som ikkje har våga å gå ut av huset fortel at no torer dei å gå på fest. Folk blir mindre redde for å få eit panikkanfall etter å ha fulgt programmet. Det seier hovudfagsstudent i psykologi, Beate Standal, som har intervjua testpersonane etter det fyrste pilotprosjektet.

Tusenvis av nordmenn har panikklidingar, kan eit nettprogram hjelpe?