Kate Moss tilbake på catwalken

Publikum braut ut i spontan applaus då Kate Moss (37) dukka opp på catwalken i Paris i dag. Moss, som ikkje har gått motevisningar sidan 2004, stiller ikkje opp på kva som helst. Det var for venen Marc Jacobs, som er designar i Louis Vuitton, ho gjorde tenesta.

Supermodellane frå 90-talet

Moss avslutta visninga kledd i bittesmå hotpants og med ein sigarett i munnviken. Supermodellane Naomi Campbell, Carolyn Murphy og Stella Tennant, som også definerte moten på 90-talet, var blant modellane på visninga.

Louis Vuitton er ei av dei mest kjende motemerkevarene i verda, og moteshowet i Paris inneheldt vertinner kledd i stuepikeuniform, kaviar på fat og shots med vodka.

Visninga var i eit telt midt i Paris, bygd opp som eit fransk, lugubert hotell, med sjakkgolv og heiser som tok modellane opp på catwalken.

(Artikkelen held fram under videoen)

Fetisjisme

Jacobs uttalte til nyheitsbyrået AP at den umettelege pågangen etter produkt med LV-logoen på var utgangspunktet for haust- og vinterkolleksjonen.

– Det er ein gal, nesten urasjonell trang etter desse objekta, desse tinga som vi skaper, sa han.

– Vi tenkte på mani, fetisjisme og eit gamalt hotell med det som foregår der av lovbrot og skandaler. Vi ville vise alle dei fantastiske skapningane som er innom der, fortalte den amerikanske designaren.

– Gir oss alt vi vil ha

Visninga får god kritikk frå dei viktigaste motemagasina.

«Det var eit fantastisk show som ikkje berre vekte publikummet klokka ti om morgonen, det vekte mikrotrendar til live og gav oss ein visjon av neste sesong,» skriv britiske Elle.

«Du kan få kva du vil neste sesong. Når det kjem til sex. (...) Jacobs har oss akkurat der han vil ha oss, og han gir oss tydelegvis alt vi vil ha,» er tolkninga til britiske Vogue.

Dyrt

Kritikaren i Vogue påpeiker at tekstilmaterialane må ha kosta like mykje som dei dyre supermodellane. Fjør, slangeskinn, pels og lakk viste igjen i kleda. Stilen var streng, polert og uniformsinspirert, og gjekk i fargane svart, blått, burgunder og mørkegrønt.

Visninga var på den siste dagen av moteveka i Paris, som elles har vore prega av at Dior sparka John Galliano for jødehets.

• Les også: – Unnskyld for min oppførsel
• Lady Gaga trampet Galliano ut av moteuka