Ein liten figur av kastanje kan no utfordre den mykje omtalte Netflix-serien «Squid Game», som har herja topplista på Netflix heilt sidan han kom ut.
Den danske serien «Kastanjemannen» har klatra oppover listene på Netflix i Noreg, og no er topplasseringa innan rekkjevidde. Den gjer det også bra internasjonalt, i Storbritannia er serien den åttande mest sette.
Vi er i København i moderne tid. Ein seriemordar er laus, og på åstadene står små «kastanjemenn» att – små fyrstikkmenn-liknande figurar laga av kvister og kastanjenøtter.
– Det har vore utruleg gøy å lage ei historie i Danmark som kjem så breitt ut. Eg er verkeleg stolt av serien, og verkeleg glad for å ha laga han, seier regissør Mikkel Serup.
Les:
Inspirert av dansk barneleik
Serien er basert på Søren Sveistrup si bok med same namn, som kom ut i 2018. Inspirasjonen til boka kom etter ei uhyggeleg oppleving han hadde då han henta dottera si i barnehagen.
– Eg såg alle dei små, uskyldige barna som sat og laga kastanjemenn. Dei sat med syl og bora i dei og song songen som også er med i «Kastanjemannen». Det var uhyggeleg på ein «Twilight-zone-aktig» måte. Det er barn med eit uskyldig, naivt univers i seg.
Kastanjemenn er noko mange danske barn har laga i løpet av oppveksten sin, og det er inspirert av denne leken og songen, at ideen til «Kastanjemannen» blei fødd.
Sveistrup er ikkje heilt ukjend for krimverda, han har tidlegare vore med å lage den danske serien «Forbrytelsen».
Nordisk preg
Serien fall innanfor sjangeren «nordisk noir», som er kjent for mørke landskap som skaper ei dyster stemning. Når det kjem til handling er den gjerne skriven frå eit politisk synspunkt og utspelar seg i Skandinavia eller Norden.
Kjende seriar som «Forbrytelsen» og «Broen» fell innanfor den same sjangeren som nådde fekk mykje internasjonal merksemd for nokon år sidan, ifølgje medievitar Gry Cecilie Rustad.
Serieregissør Mikkel Serup meiner likevel «Kastanjemannen» har eit særeige preg.
– Det har skjedd nokre veldig interessante ting med tanke på å finne ein varme i fargane. Sjølv om den skil seg mykje frå den nordiske noiren du kjenner frå før, vil du likevel kunne kjenna att element som er nordiske/skandinaviske.
Kan opne dører
Når serien no er på topplistene i både Noreg og Storbritannia, kan det føre til vidare satsing på nordisk krim, ifølgje film- og seriemeldar i NRK, Sigurd Vik. Dette det gjeld spesielt sidan Netflix står bak serien.
– Netflix er stort med tanke på tal og kommersiell suksess. Det kan ha mykje å seie om Netflix opplever at «Kastanjemannen» er ein veg vidare i kva dei ynskjer å satse på av nordiske filmar og seriar, seier Vik.
Om han opplev stor suksess, har serien potensial til å bli ein døropnar med tanke på kva for type produksjonar det blir satsa på vidare, ifølgje Vik.