West har bede følgarane hans på Twitter om å presse Zuckerberg til å støtte han, skriv nyheitsbyrået Reuters.
– Verden, ver så snill, bruk Twitter, Facetime, Facebook, Instagram, eller kva du kan for å få Mark til å støtte meg ...
West, som altså hevdar at han har over 450 millionar kroner i personleg gjeld, seier at folk ikkje vil gi pengar til «ekte artistar» som han sjølv, og i staden brukar pengar på å opne skular i Afrika.
Fleire av følgarane til West har prøvd å formidle vidare ønsket til Zuckerberg, som ikkje har Twitter-konto. Men han har enno ikkje svart.
Ny plate
Det var laurdag kveld, før han skulle framføre musikk frå si åttande studioplate, «The Life of Pablo», på komishowet «Saturday Night Live», West fortalde om gjelda.
Den nye plata har vore utsett fleire gongar. Laurdag sa han at ho skulle vere tilgjengeleg for nedlasting på heimesida hans. Men like etter ombestemte han seg, og tok plata av nettet. I staden blei ho berre tilgjengeleg for kundar av strøymetenesta Tidal.
Tidal er eigd av rapparen Jay-Z, som også har fått æra av å ha oppdaga Kanye West.
Dyre klede
West, som er gift med reality-tv-stjerna Kim Kardashian, har brukt fleire tital millionar kroner på ein eigen kleskolleksjon. Dette skal vere svært dyre klede. Frakkar og jakker skal koste opp mot 35000 kroner. Ei treningsbukse kostar over 4000 kroner.
Under New York Fashion Week førre veke, lanserte West sin nye kolleksjon, og gav også ein smakebit frå den nye plata. Over 20 millionar sjåarar følgde showet som blei strøyma på nettet.